સાસરિયાઓએ ઘરે ડૉક્ટર બોલાવી મહિલાનો ગર્ભપાત કરાવી ભ્રૂણને ખેતરમાં દાટ્યો, આ રીતે ઝડપાયા

દેશમાં ગર્ભપાત પર પ્રતિબંધ છે, તેવામાં મહિલાના સાસરિયાઓએ ઘરમાં જ ગેરકાયદેસર રીતે મહિલાનો ગર્ભપાત કરાવવાનો પ્રયાસ કર્યો હતો, જેના કારણે તેનું મોત થયું હતું. આ ચોંકાવનારો મામલો પુણેનો છે, જેમાં પોલીસે મહિલાના પતિ અને સસરાની ધરપકડ કરી છે. આ મામલામાં મૃતકની સાસુ વિરુદ્ધ પણ કેસ નોંધવામાં આવ્યો છે. પોલીસે જણાવ્યું કે અત્યાર સુધીની તપાસમાં જાણવા મળ્યું છે કે મૃતકનો ગર્ભપાત ઘરમાં જ થયો હતો અને 4 મહિનાના ભ્રૂણને પરિવારના ખેતરમાં દાટી દેવામાં આવ્યો હતો. આ ગર્ભપાત કરવા માટે એક ખાનગી ડોક્ટરને બોલાવવામાં આવ્યો હતો, પોલીસ તેની પણ શોધ કરી રહી છે.

મૃતકના લગ્ન 2017માં આરોપી સાથે થયા હતા. બંનેને એક પુત્ર અને એક પુત્રી છે અને મહિલા ત્રીજી વખત ગર્ભવતી હતી. પોલીસને આશંકા છે કે કદાચ પરિવારના સભ્યોને જ્યારે ખબર પડી કે ગર્ભમાં રહેલું બાળક છોકરી છે તો તેઓએ બાળકીનો ગર્ભપાત કરાવવાનું નક્કી કર્યું અને ઘરે આવું કર્યા બાદ તેનું મોત થઈ ગયું. પુણેના ઈન્દાપુર પોલીસ સ્ટેશનના એક અધિકારીએ જણાવ્યું કે, 'રવિવારે 25 વર્ષની મહિલાની હાલત ખરાબ થઈ ગઈ હતી. તેને ખૂબ લોહી વહી રહ્યું હતું. બીજા જ દિવસે તેને હોસ્પિટલમાં લઈ જવામાં આવી, પરંતુ તેનું મૃત્યુ થયું. મૃતકના ભાઈની ફરિયાદના આધારે સાસરિયાઓ સામે ગુનો નોંધવામાં આવ્યો છે.

પતિ અને સસરાની ધરપકડ 

આ પછી જ તેના પતિ અને સસરાની ધરપકડ કરવામાં આવી હતી. પોલીસે દાટેલા ભ્રૂણને પણ કબજે કરી લીધું છે અને તેને પોસ્ટમોર્ટમ માટે મોકલવામાં આવ્યું છે. પોલીસે ભારતીય ન્યાય સંહિતાની કલમ 91, 90, 85 હેઠળ આ કેસ નોંધ્યો છે. ઘરમાં જ ગર્ભપાત કરવાનો પ્રયાસ શા માટે કરવામાં આવ્યો તે અંગે હજુ સુધી કોઈ સ્પષ્ટતા થઈ નથી. તે જ સમયે, પોલીસનું કહેવું છે કે આ કેસમાં તેમને પ્રબળ આશંકા છે કે ગર્ભમાં પુત્રીની હાજરી મળી આવી હશે અને આ માહિતી મળ્યા બાદ ગર્ભપાતનો નિર્ણય લેવામાં આવ્યો હતો.