Sabarkanthaમાં તંત્રની બેદરકારી સામે ગ્રામજનોનો હલ્લાબોલ; પાયાની સુવિધાઓ ન મળતા ચૂંટણી બહિષ્કારની આપી ચીમકી

એક તરફ સરકાર 'ડિજિટલ ગુજરાત' અને 'વાઈબ્રન્ટ વિકાસ'ની વાતો કરી રહી છે, ત્યારે સાબરકાંઠાના અંતરિયાળ વિસ્તારની વરવી વાસ્તવિકતા સામે આવી છે. પોશીના તાલુકાના બારા ગામના રહીશોને પાયાની સુવિધાઓ ન મળતા આગામી તાલુકા અને જિલ્લા પંચાયતની ચૂંટણીનો બહિષ્કાર કરવાની સત્તાવાર ચીમકી ઉચ્ચારી છે.

ગામમાં વર્ષોથી રોડ-રસ્તા, વીજળી અને પીવાના પાણીની વિકટ સમસ્યા છે. વારંવારની રજૂઆતો છતાં તંત્રના બહેરા કાને અથડાઈને રજૂઆતો પાછી આવતા, આજે ગ્રામજનોનો આક્રોશ ફાટી નીકળ્યો હતો. રહીશોએ હાથમાં બેનરો લઈ અને ઢોલ-નગારા વગાડી તંત્ર સામે પોતાનો વિરોધ નોંધાવ્યો હતો. શાળા-કોલેજ જતા વિદ્યાર્થીઓ અને દર્દીઓને બિસ્માર રસ્તાઓને કારણે પડતી અસહ્ય મુશ્કેલીઓનો ઉકેલ ન આવતા ગ્રામજનોએ આક્રોશ વ્યક્ત કર્યો છે. તંત્ર દ્વારા વિકાસના વાયદાઓ પૂર્ણ ન થાય ત્યાં સુધી મતદાન ન કરવાની ચીમકી આપતા સ્થાનિક રાજકારણમાં ખળભરાટ મચી ગયો છે.