Video: ઉમરગામના નગવાસ ગામે વેરહાઉસમાં લાગેલી આગ હજી પણ યથાવત

વલસાડ જિલ્લાના ઉમરગામ તાલુકાના નગવાસ ગામે આવેલ વેરહાઉસમાં ગઈકાલે ફાટી નીકળેલી ભીષણ આગ હજી પણ યથાવત છે અને આગ પર સંપૂર્ણ કાબૂ મેળવવામાં હજુ સફળતા મળી નથી. મળતી માહિતી મુજબ, આ વેરહાઉસમાં મોટા પ્રમાણમાં જ્વલનશીલ પદાર્થો અને વિવિધ સામગ્રીઓ રાખવામાં આવી હતી. એટલું જ નહીં, તેની સાથે આસપાસની એક પ્લાસ્ટિક કંપની પણ આગની ચપેટમાં આવી ગઈ છે, જેના કારણે આગ વધુ વિકરાળ બની છે. ઘટનાની જાણ થતાં જ ફાયર બ્રિગેડની ગાડીઓ તાત્કાલિક ઘટનાસ્થળે દોડી આવી હતી અને આગ પર કાબૂ મેળવવા માટે યુદ્ધના ધોરણે પાણીનો છાંટો કરી ભારે જહેમત ઉઠાવી રહી છે. જોકે, જ્વલનશીલ સામગ્રી અને પ્લાસ્ટિકના કારણે આગ પર કાબૂ મેળવવો મુશ્કેલ બન્યો છે. સદનસીબે અત્યાર સુધી કોઈ જાનહાનીના સમાચાર નથી, પરંતુ આગને કારણે લાખો રૂપિયાની સંપત્તિ અને માલસામાન સ્વાહા થઈ જવાની આશંકા છે.