Valsad: પારડી નજીક નેશનલ હાઈવે પર અકસ્માત, કન્ટેનરની અડફેટે બાઈક ચાલકનું મોત

વલસાડ જિલ્લાના પારડી નજીકથી પસાર થતા નેશનલ હાઈવે પર વધુ એક માર્ગ અકસ્માતની ગંભીર ઘટના બની છે. આ અકસ્માતમાં કન્ટેનર ટ્રકે એક બાઈક ચાલકને અડફેટે લેતા બાઈક ચાલકનું ઘટનાસ્થળે જ કરૂણ મોત નીપજ્યું હતું.

બનાવની જાણ થતાં જ આસપાસના લોકો મોટી સંખ્યામાં ઘટનાસ્થળે એકઠા થઈ ગયા હતા. જોકે, આ અકસ્માતને પગલે સ્થાનિક લોકોમાં ભારે રોષ જોવા મળ્યો હતો. સ્થાનિકોના જણાવ્યા મુજબ, થોડા સમય અગાઉ પણ આ જ જગ્યા પર અકસ્માત સર્જાયો હતો, તેમ છતાં તંત્ર દ્વારા કોઈ યોગ્ય પગલાં લેવામાં આવ્યા નથી.

વારંવાર અકસ્માતો થતા હોવા છતાં ખતરનાક પોઈન્ટ પર સુરક્ષાના પગલાં ન લેવાતા હોવાથી લોકોનો ગુસ્સો ભભૂકી ઉઠ્યો હતો. પોલીસે ઘટનાસ્થળે પહોંચીને કાયદેસરની કાર્યવાહી હાથ ધરી હતી અને મૃતકના મૃતદેહને પોસ્ટમોર્ટમ માટે મોકલી આપ્યો હતો.