વડોદરા પોલીસે ગોરવાના મોલમાંથી પંજાબનો વોન્ટેડ આરોપીને ઝડપ્યો , કુખ્યાત ફૌજી ગેંગ સાથે સંકળાયેલો આ શખ્સ

જર્મનીથી કાર્યરત કુખ્યાત પંજાબ સ્થિત જીવન ફૌજી ગેંગના એક શંકાસ્પદ સાથીની વડોદરામાં ધરપકડ કરવામાં આવી છે. પંજાબના અમૃતસરમાં પોલીસ સ્ટેશનમાં થયેલા વિસ્ફોટની જવાબદારી સ્વીકાર્યા બાદ આ ગેંગ ચર્ચામાં આવી હતી.

આ ગેંગનો માસ્ટરમાઇન્ડ જર્મનીમાં

પોલીસ માહિતી અનુસાર, આ ગેંગનો માસ્ટરમાઇન્ડ જર્મનીમાં છે. ગેંગના એક કથિત સભ્ય  ખંડણી અને પંજાબના બટાલામાં ડેરા બાબા નાનક પોલીસ સ્ટેશન પર ગોળીબારના કેસમાં વોન્ટેડ હતો. આરોપી વડોદરામાં હોવાની માહિતી મળતાં, શહેર પોલીસે વિવિધ વિસ્તારોમાં સર્ચ ઓપરેશન શરૂ કર્યું.

મરીન સિક્યુરિટી યુનિફોર્મ પહેરેલો મળી આવ્યો

ગોરવાના ઇનઓર્બિટ મોલમાં એક શંકાસ્પદ વ્યક્તિની હાજરીની માહિતી મળ્યા બાદ, પોલીસે નજર રાખી અને શોપર્સ સ્ટોપ સ્ટોર નજીકથી આરોપીની ધરપકડ કરી હતી. તે મરીન સિક્યુરિટી યુનિફોર્મ પહેરેલો મળી આવ્યો હતો. પૂછપરછ દરમિયાન, આરોપીએ પોતાની ઓળખ સુનિલ ઉર્ફે લબ્ભા મસીહ તરીકે આપી, જે પંજાબના ગુરદાસપુર જિલ્લાના ડેરા બાબા નાનક તાલુકાના શાહપુર જાજનનો રહેવાસી છે. વડોદરા પોલીસે ધરપકડ અંગે પંજાબ પોલીસને જાણ કરી છે અને વધુ તપાસ ચાલુ છે.