મહિસાગર: દધાલિયા ગામના મહિલા સરપંચના પિતા અને વચેટિયો લાંચ લેતા રંગે હાથ ઝડપાયા

રાજ્યના મહિસાગર જિલ્લાના કડાણાના દધાલિયામા લાંચિયા શખ્સો લાંચ લેતા ઝડપાયા છે. મળતા અહેવાલ પ્રમાણે  મહીસાગર જિલ્લાના કડાણા તાલુકાની દધાલિયા પંચાયતના મહિલા સરપંચના પિતા અને વચેટિયો આવાસ યોજનાના લાભાર્થી પાસેથી રૂ. ૨૦ હજારની લાંચ લેતા એલસીબીએ ઝડપી પાડયા છે. 

હપ્તામાં મહિલા સરપંચના પિતા અને વચેટિયાએ લાંચ માંગી

ગામમાં પ્રધાનમંત્રી આવાસ યોજનાના લાભાર્થીઓના ખાતામાં સરકાર તરફથી જે હપ્તો જમા કરવામાં આવે છે તે હપ્તામાં મહિલા સરપંચ કૈલાશબેન વાગડીયાના પિતા અરવિંદ ભુરાભાઇ વાગડીયા અને તેનો વચેટિયો દિગ્વિજયસિંહ અભેસિંહ પુવાર કમિશન લેતા હોવાનો ફરિયાદીએ આક્ષેપ કર્યો હતો. ફરિયાદી પાસેથી અરવિંદ વાગડિયા અને દિગ્વિજયસિંહે આવાસ યોજનાના બે હપ્તની ટકાવારી પેટે રૂ. ૨૨,૫૦૦ની માગ કરી હતી.

લાંચની રકમ સાથે બન્ને શખ્સો રંગે હાથ ઝડપાયા

જો કે ફરિયાદી લાંચ આપવા માંગતા ન હોય તેમણે લાંચ રૂશ્વત વિરોધી શાખાનો સંપર્ક કરીને ફરિયાદ આપી હતી. મહીસાગર એ.સી.બી. દ્વારા ગોઠવાયેલ લાંચના છટકા દરમ્યાન મલેકપુર ચોકડી પાસે,ગૌરી કિરાણા સ્ટોર  આગળ વચેટિયો આરોપી દિગ્વીજયસિંહ અભેસિંહ પુવાર ફરીયાદી સાથ વાતચીત કરી રૂ.૨૦,૦૦૦ પંચની હાજરીમાં સ્વીકારતા ઝડપાઇ ગયો હતો આ સમયે સરપંચના પિતા આરોપી અરવિંદભાઇ  ભુરાભાઇ વાગડીયા પણ ત્યા હાજર હતા. એસીબીએ બન્ને આરોપીને ઝડપી પાડીને આગળની કાર્યવાહી શરૂ કરી છે.