તહેવાર પહેલા તવાઈ: Rajkotમાં ચાઈનીઝ દોરીનું વેચાણ કરતો શખ્સ ઝડપાયો

મકરસંક્રાંતિનો તહેવાર જેમ જેમ નજીક આવી રહ્યો છે તેમ તેમ પ્રતિબંધિત ચાઈનીઝ દોરીના વેચાણ પર પોલીસની ચાંપતી નજર વધી રહી છે. રાજકોટમાં આ પ્રતિબંધિત દોરીના વેચાણને અટકાવવા માટે પોલીસે સઘન ઝુંબેશ હાથ ધરી છે, જેના ભાગરૂપે એક શખ્સને ચાઈનીઝ દોરીના જથ્થા સાથે ઝડપી પાડવામાં આવ્યો છે.

પ્રાપ્ત માહિતી અનુસાર, રાજકોટ પોલીસ દ્વારા હાથ ધરાયેલી કામગીરીમાં પ્રતિબંધિત ચાઈનીઝ દોરીના 33 નંગ રીલ ઝડપી પાડવામાં આવ્યા છે. આ રીલ સાથે જગદીશભાઈ ધરજીયા નામના શખ્સની ધરપકડ કરવામાં આવી છે.

ચાઈનીઝ દોરી જીવલેણ સાબિત થતી હોવાથી તેના વેચાણ, સંગ્રહ અને ઉપયોગ પર કાયદાકીય પ્રતિબંધ મૂકવામાં આવ્યો છે. તેમ છતાં, કેટલાક વેપારીઓ તહેવાર દરમિયાન નફાખોરી માટે છૂપી રીતે તેનું વેચાણ કરતા હોય છે.

પોલીસે જગદીશભાઈ ધરજીયાને ઝડપીને આ પ્રતિબંધિત માલનો જથ્થો ક્યાંથી લાવવામાં આવ્યો હતો અને તે કોને કોને સપ્લાય કરવાનો હતો તે અંગેની વધુ તપાસ હાથ ધરી છે.