VIDEO: તાપીમાં નેશનલ હાઈવે ૫૬ પર નવા બનેલા બ્રિજમાં પડ્યા મસમોટા ભૂવા
છેલ્લું અપડેટ : 03 Jul 2026
તાપી જિલ્લામાંથી પસાર થતા નેશનલ હાઈવે નંબર ૫૬ પરથી સરકારી કામગીરીની પોલ ખોલતા દ્રશ્યો સામે આવ્યા છે. વાપીથી શામળાજીને જોડતા આ વ્યસ્ત હાઈવે પર તાજેતરમાં જ એક નવો માઈનોર બ્રિજ બનાવવામાં આવ્યો હતો. પરંતુ ચોમાસાના આ પહેલા જ વરસાદમાં આ કરોડોના ખર્ચે બનેલા બ્રિજની ગુણવત્તાના લીરેલીરા ઉડી ગયા છે. ડોલવણ તાલુકાના ગડત ગામ પાસેથી પસાર થતા આ હાઈવે પર પહેલા જ વરસાદે મસમોટો ભૂવો પાડી દીધો છે.નવા બનેલા એપ્રોચ રોડની બંને બાજુએ મસમોટા ભૂવા પડી જતાં હાઈવે ઓથોરિટીના ભ્રષ્ટાચારની પોલ ખુલ્લી પડી ગઈ છે. પ્રથમ વરસાદ પણ આ નવો બ્રિજ સહન કરી શક્યો નથી, જેને પગલે નેશનલ હાઈવેની નબળી કામગીરી સામે સ્થાનિકોમાં અનેક સવાલો અને ભારે રોષ ઉભો થયો છે. હાઈવે પરથી પસાર થતા વાહનચાલકો માટે આ ભૂવાઓ અત્યારે ભારે જોખમરૂપ સાબિત થઈ રહ્યા છે ત્યારે તંત્ર આ મામલે શું પગલાં લેશે તે જોવું રહ્યું.
