VIDEO: Suratમાં કાપડ દલાલની હત્યા બાદ પોલીસનું કોમ્બિંગ, અસામાજિક તત્ત્વોના ઘરે જઈ કરાઈ તપાસ
છેલ્લું અપડેટ : 05 Aug 2025
સુરતમાં થયેલી કાપડ દલાલની હત્યાને લઈને પોલીસ સજાગ થઈ ગઈ છે. પોલીસ દ્વારા લિંબાયત વિસ્તારમાં કોમ્બિંગ હાથ ધરવામાં આવ્યું હતું. ગુનેગારોને કાયદાનો ડર બતાવવા આ કવાયત શરૂ કરવામાં આવી છે. પોલીસે સંગમ સર્કલથી લઈને મીઠીખાડી વિસ્તાર સુધીના સંવેદનશીલ વિસ્તારોમાં સઘન ચેકિંગ હાથ ધર્યું હતું. આ કોમ્બિંગ દરમિયાન, ખાસ કરીને અસામાજિક તત્વો અને ભૂતકાળમાં ગુનાહિત પ્રવૃત્તિઓમાં સંડોવાયેલા શખ્સોના રહેઠાણો પર પોલીસ દ્વારા તપાસ કરવામાં આવી હતી. આ ચેકિંગ દરમિયાન પોલીસ દ્વારા ગુનેગારોની એક યાદી તૈયાર કરવામાં આવી હતી, જેમાં લગભગ 20થી વધુ ગુનેગારોના નામ સામેલ હતા. આ ગુનેગારો મારામારી, લૂંટ, ચોરી, હત્યાનો પ્રયાસ અને હત્યા જેવા ગંભીર ગુનાઓમાં સંડોવાયેલા છે. પોલીસના આ રાત્રિ કોમ્બિંગનો મુખ્ય હેતુ ગુનાખોરીને અંકુશમાં રાખવાનો અને અસામાજિક તત્વોને કાયદાનો ડર બતાવવાનો છે. પોલીસના ઉચ્ચ અધિકારીઓએ જણાવ્યું કે, આ પ્રકારની કાર્યવાહી ભવિષ્યમાં પણ ચાલુ રહેશે. જે ગુનેગારો હાલમાં ફરાર છે, તેમને ઝડપી પાડવા માટે પણ પોલીસે કવાયત શરૂ કરી છે.
