અમદાવાદ: SOGએ 6.47 લાખના MD ડ્રગ્સ સાથે બે લોકોની કરી ધરપકડ, આ કારણે મહિલાએ શરૂ કર્યો હતો નશાનો કારોબાર

અમદાવાદના ઇસનપુર વિસ્તારમાંથી SOGએ લાખો રૂપિયાની કિંમતના એમ.ડી ડ્રગ્સ સાથે મહિલા સહિત બે લોકોની ધરપકડ કરી છે. આ મામલે એસઓજીએ NDPSનો ગુનો દાખલ કરીને વધુ કાર્યવાહી હાથ ધરી છે. 

એસઓજીની ટીમને મળેલી માહિતીના આધારે ઇસનપુરમાં આવેલા અમજા ફ્લેટમાંથી આ બંને આરોપીઓને ધરપકડ કરી છે. પોલીસે ઘરમાં તપાસ કરતા 6.47 લાખથી વધુની કિંમતનો 64 ગ્રામ 790 મીલી ગ્રામ એમ.ડી ડ્રગ્સ મળી આવ્યું હતું. 

આરોપી આમિર 200- 300 રૂપિયા લઈને ડ્રગ્સની ડીલીવરી કરતો 

પકડાયેલા આરોપીઓની પૂછપરછ કરતાં સામે આવ્યું કે, પકડાયેલી મહિલા શાહીનબાનુ સૈયદનો પતિ કોઈ કામ ધંધો કરતો ન હતો. ઘર ચલાવવા માટે પૈસાની જરૂર હોવાના કારણે ડ્રગ્સ વેચવાનું શરૂ કર્યું હતું. એક વર્ષ પહેલા તેની મુલાકાત રામોલમાં રહેતી સિરીનબાનુ શેખ સાથે થઈ હતી.  તેણે આ આરોપીને ટુકડે ટુકડે ડ્રગ્સ આપવાનું શરૂ કર્યું હતું. શાહીનબાનુ સૈયદ પોતાના ઘરમાંથી જ ડ્રગ્સનું વેચાણ કરતી હતી અને જે ગ્રાહકોને ડિલિવરી જોઈતી હોય તેઓને પકડાયેલા અન્ય આરોપી મારફતે ડ્રગ્સ પહોંચાડતી હતી. આમિર ખાન પઠાણ 200- 300 રૂપિયા લઈને ડ્રગ્સની ડીલીવરી કરતો હતો. 

ગુનામાં ફરાર મહિલાની શોધખોળ હાથ ધરવામાં આવી

આ મામલે ઝડપાયેલી મહિલા છેલ્લા એક વર્ષથી ડ્રગ્સનું વેચાણ કરતી હોવાનું સામે આવ્યું છે.  SOGએ વધુ તપાસ કરતા સામે આવ્યું કે ફરાર સિરીનબાનુ શેખનો પતિ અકબર અગાઉ SOGના હાથે જ ડ્રગ્સના કેસમાં ઝડપાયો હતો. અને તે છેલ્લા ઘણા મહિનાઓથી જેલમાં બંધ છે. તેવામાં આ ગુનામાં ફરાર મહિલાની શોધખોળ હાથ ધરવામાં આવી છે.