VIDEO : પ્લેન ક્રેશના સાઇલન્ટ હીરોઝ: પીએમ રૂમમાં લખાઈ માનવતાની ગાથા

અમદાવાદમાં થયેલા ભયાનક પ્લેન ક્રેશ બાદ જ્યાં એક તરફ કાટમાળ વચ્ચે બચાવ કામગીરી ચાલી રહી હતી, તો બીજી તરફ હોસ્પિટલોમાં ઈજાગ્રસ્તોની સારવાર થઈ રહી હતી. પરંતુ આ બધાની વચ્ચે સિવિલ હોસ્પિટલના પોસ્ટમોર્ટમ રૂમની ચાર દીવાલો વચ્ચે એક અલગ જ લડાઈ ચાલી રહી હતી—જ્યાં આંખોમાં આંસુ વહાવવાનો પણ સમય નહોતો.

દુર્ઘટના એટલી ગંભીર હતી કે મોટાભાગના મૃતદેહો અત્યંત ક્ષત-வિક્ષત હાલતમાં હતા. આવા કપરા સમયે કલાકો સુધી આરામ કર્યા વગર, અન્ન-જળના ત્યાગ સાથે વર્ગ-4ના કર્મચારીઓ અને ડોક્ટરો ખડેપગે રહ્યા. એક તરફ સ્વજનોનું કાળજું કંપાવતું આક્રંદ અને બીજી તરફ સતત આવતા મૃતદેહો વચ્ચે, પોતાની માનસિક સ્થિતિ અકબંધ રાખીને આ કર્મચારીઓએ દરેક મૃતદેહને પૂરા સન્માન સાથે હેન્ડલ કર્યો અને ઓળખ પ્રક્રિયામાં કોઈ ભૂલ ન થાય તેની તકેદારી રાખી.

સામાન્ય રીતે આવી આપત્તિઓમાં ડોક્ટરો, નેતાઓ અને રેસ્ક્યૂ ટીમો જ હેડલાઈન્સમાં રહે છે. પરંતુ પીએમ રૂમની અસહ્ય ગંધ અને ઘાતક વાતાવરણ વચ્ચે કામ કરતા આ વીર કર્મચારીઓ ક્યારેય કોઈ કેમેરામાં દેખાતા નથી. સિવિલના આ કર્મચારીઓએ સાબિત કર્યું કે, સૌથી મુશ્કેલ સમયમાં મૃતકોને સન્માન આપવું અને જીવતા બચેલા પરિવારોને વહેલી તકે સહારો આપવો એનાથી મોટી કોઈ દેશભક્તિ નથી.અમદાવાદ પ્લેન ક્રેશના આ કાળા ડિબાંગ ઈતિહાસમાં, આ સાઇલન્ટ હીરોઝે પડદા પાછળ રહીને માનવતાનો અજોડ ઈતિહાસ લખ્યો છે. પીડિત પરિવારોના આંસુ લૂછવામાં તેમનો આ ફાળો સદીઓ સુધી યાદ રાખવામાં આવશે. સલામ છે સિવિલ હોસ્પિટલના પીએમ રૂમના આ તમામ કર્મચારીઓને, જેમણે મહાસંકટમાં પણ માનવતાનો દીવો પ્રજ્વલિત રાખ્યો.