Bharuch/ વાગરા GIDCની ફાર્મા કંપનીમાં રિએક્ટર ફાટ્યું, 15 કિમી સુધી સંભળાયો અવાજ! 5 શ્રમિકોનાં મોત

Bharuch Blast News: ગુજરાતના ભરૂચ જિલ્લામાં ઔદ્યોગિક દુર્ઘટનાની ગંભીર ઘટના સામે આવી છે. વાગરા GIDCમાં આવેલી સેનઝીલ ફાર્મા કેમ પ્રાઇવેટ લિમિટેડ કંપનીમાં મોડી રાત્રે 15 હજાર લિટરની ક્ષમતા ધરાવતા રિએક્ટરમાં પ્રચંડ બ્લાસ્ટ થયો હતો. આ દુર્ઘટનામાં પાંચ શ્રમિકોનાં ઘટનાસ્થળે જ મોત નીપજ્યાં છે, જ્યારે અન્ય છ શ્રમિકો ગંભીર રીતે ઘાયલ થયા હોવાના અહેવાલ છે. આ ઘટનાને પગલે સમગ્ર વિસ્તારમાં શોક અને ભયનો માહોલ છવાઈ ગયો છે.

ધડાકો એટલો પ્રચંડ કે 15 કિમી સુધી સંભળાયો અવાજ!

મળતી માહિતી મુજબ, શુક્રવારે મોડી રાત્રે કંપનીમાં રાસાયણિક પ્રક્રિયા દરમિયાન અચાનક રિએક્ટરમાં જોરદાર બ્લાસ્ટ થયો હતો. ધડાકો એટલો પ્રચંડ હતો કે તેની અસર આસપાસના વિસ્તારમાં અનુભવાઈ હતી. અહેવાલો અનુસાર, લગભગ 15 કિલોમીટર સુધી ધડાકાનો અવાજ સંભળાતાં લોકો ગભરાઈને ઘરની બહાર દોડી આવ્યા હતા.

બ્લાસ્ટને કારણે ફેક્ટરીની મશીનરીના ભાગો અને શેડને ભારે નુકસાન થયું હતું. ઘટનાની ગંભીરતાને કારણે કંપનીમાં અફરાતફરીનો માહોલ સર્જાયો હતો. આસપાસના વિસ્તારોમાં રહેતા લોકો પણ ઘટનાસ્થળે એકઠા થઈ ગયા હતા.

પાંચ શ્રમિકોનાં ઘટનાસ્થળે જ મોત, છ ગંભીર રીતે ઘાયલ

આ દુર્ઘટનામાં પાંચ શ્રમિકોએ જીવ ગુમાવ્યા છે, જ્યારે અન્ય છ શ્રમિકો ગંભીર રીતે ઘાયલ થયા હોવાનું જાણવા મળ્યું છે. ઘાયલોને સારવાર માટે ભરૂચની એપેક્સ હોસ્પિટલમાં ખસેડવામાં આવ્યા છે. બીજી તરફ, મૃતકોનાં મૃતદેહોને ભરૂચ સિવિલ હોસ્પિટલમાં લઈ જવામાં આવ્યા છે.

રિએક્ટરમાં બ્લાસ્ટ થયા બાદ ગેસ લીકેજ જેવી સ્થિતિ સર્જાઈ હોવાના અહેવાલને કારણે આસપાસના લોકોમાં પણ ચિંતા ફેલાઈ હતી. જોકે, ગેસ લીકેજની સ્થિતિ અને તેના વ્યાપ અંગેની વિગતોની સત્તાવાર પુષ્ટિ જરૂરી છે.

મૃતકોમાં ત્રણની ઓળખ જાહેર, એકની ઓળખ બાકી

પ્રાથમિક અહેવાલો અનુસાર, દુર્ઘટનામાં જીવ ગુમાવનારા પાંચ શ્રમિકોમાંથી ચારનાં નામ સામે આવ્યાં છે. તેમની વિગતો નીચે મુજબ છે:

• જયદીપ પટેલ: ઉંમર 27 વર્ષ

• અનિકેત કુમાર: ઉંમર 24 વર્ષ

• અર્જુન રામ સિંહ: ઉંમર 20 વર્ષ

• વૃંદ તાલવિયા

• એક શ્રમિકની ઓળખ હજુ બાકી છે.

આ દુર્ઘટનાથી મૃતક શ્રમિકોના પરિવારોમાં શોકની લાગણી ફેલાઈ છે. ઔદ્યોગિક એકમમાં રિએક્ટર બ્લાસ્ટ થવાનું ચોક્કસ કારણ શું હતું અને સુરક્ષાની વ્યવસ્થામાં કોઈ ખામી હતી કે નહીં, તે અંગે વધુ વિગતો સામે આવવાની બાકી છે.