Video : સ્ટંટબાજોને પોલીસનો પાઠ, બે યુવકોને દબોચી કરાવ્યું કાયદાનું ભાન
છેલ્લું અપડેટ : 30 Oct 2025
રાજકોટ જિલ્લાના ધોરાજીમાં જીવનને જોખમમાં મૂકીને જાહેરમાં જોખમી સ્ટંટ કરનારા નબીરાઓ સામે આખરે ધોરાજી તાલુકા પોલીસે સખત કાર્યવાહી કરી છે. સોશિયલ મીડિયા પર આ સ્ટંટના વીડિયો વાયરલ થયા બાદ પોલીસે બે આરોપીઓને ઝડપી લીધા છે.
હાઇવે પર જોખમી સ્ટંટ
ધોરાજીના જેતપુર નેશનલ હાઇવે રોડ પર કેટલાક યુવકો બાઈક પર જીવલેણ સ્ટંટ કરી રહ્યા હોવાના વીડિયો સામે આવ્યા હતા. આ વીડિયોમાં આ યુવકો પોતાના અને અન્ય રાહદારીઓના જીવનને જોખમમાં મૂકી રહ્યા હોવાનું સ્પષ્ટ દેખાતું હતું. ટીવી ન્યૂઝ ચેનલો પર આ વીડિયો પ્રસિદ્ધ થતાં, ધોરાજી તાલુકા પોલીસ સક્રિય થઈ અને આવા સ્ટંટબાજોને કાયદાનું ભાન કરાવવા માટે કડક કાર્યવાહી હાથ ધરી.
જાહેર માફી
પોલીસે તાત્કાલિક પગલાં લઈને આ સ્ટંટ કરનારા બે આરોપીઓને ઝડપી પાડ્યા હતા. કાયદાનું ઉલ્લંઘન કરનારા આ યુવકોને પોલીસ સ્ટેશને લાવવામાં આવ્યા હતા, જ્યાં તેમને જાહેર માફી માંગવાની ફરજ પડી હતી. ઝડપાયેલા આરોપીઓએ સ્વીકાર્યું હતું કે તેઓ ભવિષ્યમાં આવી ભૂલ ફરી નહીં કરે અને અન્ય લોકોને પણ આવા જોખમી કૃત્યોથી દૂર રહેવા અપીલ કરી હતી.
