Video: નબીરાઓની નશીલી પાર્ટીમાં પોલીસની કામગીરી પર સવાલ

રાજકોટમાં સામે આવેલા નબીરાઓની નશીલી પાર્ટીના કેસમાં રાજકોટ બાર એસોસિએશનના પૂર્વ પ્રમુખ સુરેશ ફળદુએ મોટા આક્ષેપ કર્યા છે. સોશિયલ મીડિયાના માધ્યમથી મળેલી માહિતી અનુસાર, જે બેન્કવેટ હોલમાં આ પાર્ટી ચાલી રહી હતી ત્યાં નાર્કોટિક્સ અને હુક્કા સહિતના પ્રતિબંધિત સાધનો મળી આવ્યા હતા. સામાન્ય રીતે આવા ગંભીર કિસ્સાઓમાં હોટલ સીઝ કરવા સુધીની કડક કાર્યવાહી કરવામાં આવતી હોય છે, પરંતુ આ કેસમાં હોટલ માલિક વિરુદ્ધ કોઈ કાર્યવાહી કરવામાં આવી નથી. એટલું જ નહીં, આવા ગુનાઓમાં પોલીસ સામાન્ય રીતે સંડોવાયેલા વાહનો પણ કબ્જે કરતી હોય છે, પરંતુ આ કિસ્સામાં પોલીસે કાર કબજે કરી નથી. આ સંદર્ભે પોલીસનો એવો તર્ક છે કે પાર્ટી બેન્કવેટ હોલની અંદર ચાલતી હતી અને કાર માત્ર પાર્કિંગમાં પડી હતી. પૂર્વ પ્રમુખના આ નિવેદનથી સમગ્ર મામલે પોલીસની નિષ્પક્ષતા સામે અનેક પ્રકારની ચર્ચાઓ શરૂ થઈ ગઈ છે.