ગબ્બર-અર્જુન વિવાદમાં મુકેશ ઠાકોરની એન્ટ્રી: 'સમાજથી મોટા કોઈ નથી, વિરોધ કરશો તો એકલા પડી જશો'

બનાસકાંઠા જિલ્લામાં ઠાકોર સમાજ દ્વારા સામાજિક સુધારા માટે બનાવવામાં આવેલા 'બંધારણ'ને લઈને વિવાદ સતત વકરી રહ્યો છે. ખાસ કરીને DJ પ્રતિબંધ અને અન્ય સામાજિક નિયમો મુદ્દે સમાજના લોકપ્રિય કલાકારો અને સમાજના આગેવાનો વચ્ચે બે ભાગલા પડતા દેખાઈ રહ્યા છે. ગબ્બર ઠાકોર અને અર્જુન ઠાકોર સાથેના વિવાદમાં હવે સમાજ અગ્રણી મુકેશ ઠાકોરે મેદાને આવી મોટું નિવેદન આપ્યું છે.

"સમાજ સામે જશો તો એકલા પડી જશો": મુકેશ ઠાકોર

કલાકારો અને સમાજ વચ્ચે વધતા તણાવ વચ્ચે મુકેશ ઠાકોરે સ્પષ્ટ શબ્દોમાં જણાવ્યું છે કે, "આ બંધારણ કોઈ એક વ્યક્તિનું નથી, પરંતુ 27 તાલુકાના આગેવાનો દ્વારા વિચારીને બનાવવામાં આવ્યું છે." તેમણે કલાકારોને ચીમકીભર્યા સૂરે કહ્યું કે જો તેઓ સમાજના નિયમોની વિરુદ્ધ જશે, તો તેમણે એકલા પડી જવાની તૈયારી રાખવી પડશે.

વિક્રમ ઠાકોરના સમર્થન બાદ વિવાદ વકર્યો

ગઈકાલે જ સુપરસ્ટાર વિક્રમ ઠાકોરે ગબ્બર અને અર્જુન ઠાકોરને પોતાનું સમર્થન જાહેર કર્યું હતું. કલાકારોનું માનવું છે કે અમુક નિયમો પ્રેક્ટિકલ નથી, જ્યારે સમાજની કમિટી આ નિયમોને અમલમાં મૂકવા મક્કમ છે. વિક્રમ ઠાકોરના એન્ટ્રી બાદ આ મુદ્દો માત્ર બનાસકાંઠા પૂરતો સીમિત ન રહેતા સમગ્ર ગુજરાતમાં ચર્ચાનું કેન્દ્ર બન્યો છે.

મુખ્ય વિવાદના મુદ્દા:

• DJ પ્રતિબંધ: લગ્ન પ્રસંગોમાં DJ વગાડવા પર મુકાયેલા પ્રતિબંધનો કલાકારો વિરોધ કરી રહ્યા છે.

• બંધારણનો અમલ: ૨૭ તાલુકાના આગેવાનો આ નિયમોને સામાજિક સુધારા તરીકે જુએ છે.

• આંતરિક મતભેદ: સમાજમાં અત્યારે 'બંધારણ અમલ' વિરુદ્ધ 'કલાકારોની સ્વતંત્રતા' જેવો માહોલ સર્જાયો છે.