Video: અમદાવાદના ઓગણજની ગ્રીનવુડ્સ સોસાયટીમાં ગેરકાયદે પીજી-હોસ્ટેલ સામે હાઇકોર્ટે AMCને ફટકારી નોટિસ

અમદાવાદના ઓગણજ વિસ્તારમાં આવેલા ગ્રીનવુડ્સ સોસાયટીમાં ધમધમતી ગેરકાયદે પીજી અને હોસ્ટેલ સામે સ્થાનિક રહીશો દ્વારા લડવામાં આવી રહેલી કાનૂની લડત હવે ગુજરાત હાઇકોર્ટ સુધી પહોંચી છે. રહેણાંક વિસ્તારમાં ચાલતી વ્યાપારી પ્રવૃત્તિઓ અને AMCની કથિત નિષ્ક્રિયતા સામે હાઇકોર્ટે ગંભીર નોંધ લેતા મ્યુનિસિપલ કોર્પોરેશનને નોટિસ ફટકારી છે. અરજદારો દ્વારા આક્ષેપ કરાયો છે કે સોસાયટીના વીસથી વધુ બંગલાઓમાં ગેરકાયદે રીતે પીજી હોસ્ટેલ ચલાવવામાં આવી રહી છે અને પાંચથી છ જેટલી બહુમાળી ઇમારતો પણ મંજૂરી વગર જ ઊભી કરી દેવામાં આવી છે. અનેકવાર સ્થાનિક સ્તરે રજૂઆતો કરવા છતાં તંત્ર દ્વારા કોઈ નક્કર કાર્યવાહી કરવામાં ન આવતાં આખરે કાનૂની સહારો લેવો પડ્યો છે. રહીશોએ ગેરકાયદે બાંધકામો સામે કડક સીલિંગ અને ડિમોલિશનની કાર્યવાહી કરવાની  માંગ કરી છે, જેથી સોસાયટીનું મૂળ આવાસ સ્વરૂપ જળવાઈ રહે. આ મામલે આગામી દિવસોમાં હાઇકોર્ટમાં વધુ સુનાવણી હાથ ધરવામાં આવશે અને હાઈકોર્ટ એડવોકેટ એસોસિએશન પણ ઔપચારિક અરજી કરી શકે છે.