Tapi News: ઉપરવાસમાં ધોધમાર વરસાદથી ઉકાઈનું જળસ્તર વધ્યું, 2 ફૂટના વધારા સાથે સપાટી 316.66 થઈ 

ઉકાઈ ડેમના ઉપરવાસમાં સિઝનના પ્રારંભે જ સારો વરસાદ પડ્યો છે. સરેરાશ વરસાદ ચાર ઇંચથી વધારે થયો છે. જેના કારણે ડેમમાં પાણીના નવા નીર ગયા વર્ષ કરતા અઠવાડિયા વહેલા આવ્યા હતા. નવ દિવસમાં ડેમની સપાટીમાં બે ફૂટનો વધારો થયો છે. ઉકાઈ ડેમના ઉપરવાસના વિવિધ રેઈનગેજ સ્ટેશનો પર નોંધપાત્ર વરસાદ થયો છે. કાકડીઅંબામાં 4 ઇંચ, ચોપડવાવમાં 6 ઇંચ, કુકરમુંડામાં 2 ઇંચ, નિઝરમાં 2 ઇંચ, ઉકાઈમાં 3 ઇંચ, અક્કલકુવામાં 1 ઇંચ, દુસખેડામાં 1.5 ઇંચ, ચાંદપુરમાં 2.5 ઇંચ અને વેલંદામાં 1.5 ઇંચ વરસાદ નોંધાયો છે.

51 રેઈનગેજ સ્ટેશન પર વરસાદ

ઉપરવાસના કુલ 51 રેઈનગેજ સ્ટેશનો પર અત્યાર સુધી સરેરાશ 4.14 ઇંચ વરસાદ નોંધાયો છે, જે આ વિસ્તારમાં ચોમાસાની સારી શરૂઆત દર્શાવે છે. ઉકાઈ ડેમમાં પાણીની આવક 18 જૂનથી શરૂ થઈ, ત્યારે ડેમની સપાટી 314.63 ફૂટ હતી. નવ દિવસના ગાળામાં ડેમની સપાટીમાં બે ફૂટનો વધારો થયો છે અને હવે તે 316.66 ફૂટે પહોંચી છે. જો કે, ડેમનું રૂલ લેવલ 321 ફૂટ છે, જે હજુ પહોંચવાનું બાકી છે. આ વધારો ઉપરવાસમાં નોંધાયેલા વરસાદનું પરિણામ છે.

ટૂંકમાં જ ઉકાઈ ડેમ રૂલ લેવલે પહોંચે તેવી આશા

ઉકાઈ ડેમના ઉપરવાસમાં નોંધાયેલો વરસાદ ચોમાસાની સક્રિયતા દર્શાવે છે, જે આગામી દિવસોમાં ખેતી અને પાણી પુરવઠા માટે સકારાત્મક સંકેત આપે છે. ડેમની સપાટીમાં થયેલો વધારો સિંચાઈ અને પીવાના પાણીની જરૂરિયાતો પૂરી કરવામાં મદદરૂપ થશે. જો વરસાદનું આ પ્રમાણ જળવાઈ રહેશે, તો ડેમનું રૂલ લેવલ ટૂંક સમયમાં પ્રાપ્ત થઈ શકે છે, જે દક્ષિણ ગુજરાતના વિસ્તારો માટે લાભદાયી સાબિત થશે. ઉલ્લેખનીય છે કે ડેમનું રૂલ લેવલ 312 ફુટ છે.