છોટાઉદેપુરના નળવાંટ ગામના ખેડૂતો આકરા પાણીએ, કેનાલમાં પાણી આપવાની માગ સાથે સૂત્રોચ્ચાર

છોટાઉદેપુર જિલ્લાની સૌથી મોટી સિંચાઈ યોજના પૈકીની રામી જળાશય યોજનાની જર્જરિત કેનાલોના કારણે ખેડૂતો વર્ષોથી સિંચાઈના પાણીથી વંચિત છે. સરકાર દ્વારા ૧૦ કરોડ રૂપિયા કેનાલો બનાવવા ફાળવ્યા પરંતુ અધિકારોની બેદરકારીને લઈ અત્યાર સુધી ટેન્ડર પ્રક્રિયાની કામગીરી હાથ ધરાઈ નથી.

આ પણ વાંચોઃ રાજ્યભરમાં બાઈક ચોરીનો તરખાટ મચાવનાર દબોચાયા, છોટાઉદેપુરમાં મધ્યપ્રદેશની ટોળકીના બે ઝડપાયા

પાણી મળતું નથી

આદિવાસી બહુલ ધરાવતા છોટાઉદેપુર જિલ્લાના કવાંટ તાલુકામાં રામી જળાશય યોજના વર્ષ ૧૯૮૮ માં બનાવાઈ જેમાં ખાંડીવાવ, આથાડુંગરી, થડગામ, ગડેઠા, દેવત, જાંબા, ભેખડિયા, નળવાંટ એમ 7 ગામોને સિંચાઈ પાણી આપવાનું હતું. જેના માટે કેનાલો બનાવાઈ પરંતુ કેટલાક ગામોમાં ડેમ બન્યો ત્યારથી આજ દિન સુધી ટીપું પાણી આવ્યું નથી. હાલ માત્ર ત્રણ ગામોને જ સિંચાઈનું પાણી મળી રહ્યું છે. જ્યારે અન્ય ચાર ગામો વર્ષોથી સિંચાઈના પાણીથી વંચિત છે. આ ગામોના આદિવાસી ખેડૂતો માત્ર ચોમાસા ખેતી ઉપર નિર્ભર છે અને અન્ય ઋતુમાં અહીંના લોકો સ્થળાંતર કરી મજૂરી કરવા માટે દૂર દૂર જવા મજબૂર છે. 

ડેમ આશિર્વાદ રૂપ

વર્ષોથી સૂકી ભટ્ટ કેનાલો સાવ જર્જરિત બની છે. ખેડૂતો રોષ સાથે આક્ષેપ કરી રહ્યા છે કે ચૂંટણી સમયે નેતાઓ વોટ લેવા તો આવે છે પરંતુ એમની સમસ્યાનો હલ લાવતા નથી. જયારે આ વિસ્તારના ખડૂતોને સિંચાઈની બીજી કોઈ સુવિધાનો લાભ મળતો નથી. નર્મદા કેનાલનું પાણી સરકાર દ્વારા આપવા માટે કોઈ યોજના બનાવી નથી. ત્યારે રામી ડેમ એક આશીર્વાદ રૂપ ડેમ છે. તેના વિકાસ માટે તંત્ર દ્વારા નક્કર આયોજન કરીને કામગીરી કરવી જોઈએ.

કામગીરી માટે તરસતા ખેડૂતો

બીજી તરફ સરકાર દ્વારા ઓગસ્ટ મહિનામાં રામી જળાશય યોજનાની કેનાલો માટે ૧૦ કરોડ રૂપિયા મંજૂર કરાયા છે. પરંતુ જવાબદાર અધિકારીઓ દ્વારા અત્યાર સુધી એસ્ટીમેટ બનાવી તાંત્રિક મંજૂરી લેવાની તસ્દી લેવાઈ નથી. તેવામાં વહેલી તકે કામગીરી કરાય જેથી વર્ષોથી સિંચાઈના પાણી માટે તરસી રહેલા ખેડૂતોને પાણી મળી રહે.