BHAVNAGAR : વિદેશથી આયાત થવા લાગ્યું લોખંડ-સ્ક્રેપ, અલંગના સ્ક્રેપ વ્યવસાય પર સંકટ

Alang Bhavnagar News : ભાવનગરની આર્થિક કરોડરજ્જૂ અલંગ મંદીના વમળોમાં ફસાયેલું છે અને તેના કારણે અલંગ સાથે સંલગ્ન રોલિંગ મીલ અને સ્ક્રેપના વ્યવસાયો પર પણ અસર જોવા મળી રહી છે. મંદીના વમળોમાં ફસાયેલા અલંગને બહાર કાઢવા માટે અનેક પ્રયત્નો થઈ રહ્યાં છે પરંતુ હજુ ઘણાં સુધારાત્મક પગલા લેવાય તો અલંગ સંલગ્ન વ્યવસાયો પણ ધમધમતા થાય. અલંગમાં શિપ બ્રેકિંગ ઉદ્યોગના કારણે ભાવનગરમાં સ્ક્રેપનો વ્યવસાય પણ ફુલ્યોફાલ્યો છે પરંતુ વિદેશમાંથી આયાત થતાં લોખંડ અને સ્ક્રેપના કારણે સ્થાનિક બજારને ફટકો પડી રહ્યો છે ત્યારે આ દિશામાં શિપ રિસાયકલિંગ એસોસિએશન અને સરકાર સકારાત્મક પગલા લે તે જરૂરી છે.

અલંગના નાના સ્ક્રેપના વેપારીઓની મુશ્કેલી વધી

ભાવનગરની આર્થિક કરોડરજ્જૂ અલંગ મંદીના વમળોમાં ફસાયેલું છે અને તેની અલંગ સાથે સંલગ્ન રોલિંગ મીલ અને સ્ક્રેપના વ્યવસાયો પર પણ અસર જોવા મળી રહી છે. શિપ બ્રેકિંગ ઉદ્યોગના કારણે ભાવનગરમાં સ્કેપનો વ્યવસાય વ્યાપક પ્રમાણમાં વિસ્તરેલો છે. પરંતુ છેલ્લા બે વર્ષોમાં સ્ક્રેપના ભાવમાં આવેલા નોંધપાત્ર ઘટાડાના કારણે અલંગના નાના સ્ક્રેપના વેપારીઓની મુશ્કેલી વધી છે. સ્થાનિક કક્ષાએ ઉત્પાદન ઉપરાંત દેશમાં મોટા પ્રમાણમાં લોખંડ અને સ્ક્રેપની આયાત કરવામાં આવે છે. વિદેશમાંથી આયાત થતાં લોખંડ અને સ્ક્રેપથી અલંગના સ્ક્રેપ વ્યવસાય પણ પણ સંકટ તોળાઈ રહ્યું છે. 

બે વર્ષમાં અલંગના સ્ક્રેપનો ભાવ રૂ.17 સુધી ઘટ્યો

દેશભરમાં લોખંડ અને સ્ક્રેપના ભાવ પંજાબના મંડી બજારમાંથી નક્કી થાય છે. વિદેશમાંથી આયાત થતા લોખંડ-સ્ક્રેપના કારણે એક સમયે રૂ.50 પ્રતિ કિલો સુધી પહોંચી ગયા હતા. બાદમાં અલંગના સ્ક્રેપની છેલ્લા બે વર્ષમાં  કિંમત હાલ રૂ.17 સુધી ઘટી ગઈ છે. વર્ષ-૨૦૨૨માં અલંગમાં સ્ક્રેપનો ભાવ પ્રતિ કિલો રૂ.48થી 50 આસપાસ રહ્યો હતો. જે પછી વર્ષ 2023માં આ ભાવ રૂ.10 સુધી ઘટીને રૂ.40થી 42 રહ્યો અને ચાલુ વર્ષ-2024માં અલંગના સ્કેપની કિંમત રૂ.32થી 34 આસપાસ રહ્યો છે. 

છેલ્લા બે વર્ષમાં અલંગના સ્ક્રેપનો ભાવ રૂ.17 સુધી ગગડી જતાં અલંગ સાથે જોડાયેલા નાના-નાના સ્ક્રેપના વેપારીઓને પણ મુશ્કેલીનો સામનો કરવો પડી રહ્યો છે. 

શિપ બ્રેકિંગ એસોસિએશના હોદ્દેદારોએ  મૌન સેવ્યું

સરકાર દ્વારા અલંગને મંદીના વમળોમાંથી બહાર કાઢવા માટેને પ્રયાસો કરવામાં આવી રહ્યાં છે ત્યારે વિદેશમાંથી આયાત થતાં સ્ક્રેપ-લોખંડ પર કંટ્રોલ આવે તો જ દેશનો લોખંડ અને સ્ક્રેપનો વ્યવસાય યોગ્ય રીતે ચાલશે અને તેનો અલંગને પુરતો લાભ મળશે. આ મુદ્દે શિપ બ્રેકિંગ એસોસિએશના હોદ્દેદારોએ નિવેદન આપવાનું ટાળ્યું હતું અને મૌન સેવ્યું હતું.પરંતુ એસોસિએશન રાજ્ય અને કેન્દ્ર સરકારનું ધ્યાન દોરી કોઈ રસ્તો કાઢે તે જરૂરી છે કારણ કે તેનાથી અલંગના સ્ક્રેપના નાના વેપારીઓને ફાયદો થશે.