VIDEO: હળવદમાં સમાધાન માટે ભેગા થયેલા જૂથો વચ્ચે ધિંગાણું, સામસામે 5 સામે ફરિયાદ દાખલ

VIDEO: મોરબી જિલ્લાના હળવદ પંથકમાં કાયદો અને વ્યવસ્થાની સ્થિતિ કથળી હોય તેમ માથક ચોકડી પાસે સશસ્ત્ર જૂથ અથડામણની ઘટના સામે આવી છે. બે દિવસ પૂર્વે સોશિયલ મીડિયામાં વાયરલ થયેલા મારામારીના વીડિયો બાદ, આ વિવાદનું સમાધાન કરવા ભેગા થયેલા પક્ષો વચ્ચે ફરી એકવાર હિંસક સંઘર્ષ થયો હતો. ધોકા અને તલવાર જેવા તીક્ષ્ણ હથિયારો વડે થયેલી આ મારામારીમાં બંને પક્ષે પોલીસ ફરિયાદ નોંધાવવામાં આવી છે.

જાણો આખો મામલો
મળતી માહિતી મુજબ, હળવદની માથક ચોકડી પાસે બે દિવસ પહેલા જાહેર રોડ પર મારામારી થઈ હતી, જેનો વીડિયો સોશિયલ મીડિયામાં ખૂબ વાયરલ થયો હતો. આ જૂના ઝઘડાનું નિરાકરણ લાવવા અને સમાધાન કરવા માટે બંને પક્ષના લોકો ફરી એકઠા થયા હતા. જોકે, વાતચીત દરમિયાન મામલો બિચક્યો હતો અને સમાધાનને બદલે ઉગ્ર બોલાચાલી શરૂ થઈ હતી. જોતજોતામાં બંને પક્ષો હથિયારો સાથે સામસામે આવી ગયા હતા.

સામસામે ફરિયાદ નોંધાઈ
આ ચકચારી ઘટનામાં હળવદ પોલીસે બંને પક્ષની દલીલો સાંભળી ગુનો નોંધ્યો છે:

પ્રથમ પક્ષ: જશીબેન કાળુભાઈ વાઘેલાએ મહાદેવ કાળુભાઈ, સામંત મહાદેવભાઈ અને અન્ય એક વ્યક્તિ સહિત કુલ ૩ સામે ફરિયાદ નોંધાવી છે.

બીજો પક્ષ: સામા પક્ષે મહાદેવ કાળુભાઈ દેત્રોજાએ નવઘણ કાળુ દેવીપૂજક અને વિક્રમ સહિત બે વ્યક્તિઓ સામે વળતી ફરિયાદ નોંધાવી છે.

સ્થાનિક પોલીસે આ મામલે રાયોટિંગ અને મારામારીની કલમો હેઠળ ગુનો નોંધી વધુ તપાસ હાથ ધરી છે. ધોળાદિવસે જાહેર ચોકડી પર હથિયારો ઉછળતા સ્થાનિક વેપારીઓ અને રાહદારીઓમાં ફફડાટ વ્યાપી ગયો છે.