VIDEO: ગુજરાતમાં ફરી આગ ઓકતી ગરમી શરૂ! આગામી 3 દિવસમાં પારો 3 ડિગ્રી ઉછળશે, અમદાવાદમાં ગરમી 38ને પાર જવાની આગાહી
છેલ્લું અપડેટ : 10 Apr 2026
VIDEO: ગુજરાતમાં ફરી એકવાર વાતાવરણમાં મોટો પલટો જોવા મળી રહ્યો છે. વેસ્ટર્ન ડિસ્ટર્બન્સની અસરને કારણે હવે માવઠાની સ્થિતિ ગાયબ થઈ રહી છે અને સૂર્યદેવતા આકરા પાણીએ જોવા મળી રહ્યા છે. અમદાવાદ હવામાન વિભાગના ડાયરેક્ટર એ. કે. દાસના જણાવ્યા મુજબ, આજથી રાજ્યમાં ગરમીનું જોર વધવાની પૂરેપૂરી શક્યતા છે.
તાપમાનમાં 2થી 3 ડિગ્રીનો વધારો
હવામાન વિભાગની આગાહી અનુસાર, આગામી ત્રણ દિવસ દરમિયાન રાજ્યના ઉચ્ચતમ તાપમાનમાં 2થી 3 ડિગ્રી સેલ્સિયસનો વધારો નોંધાઈ શકે છે. ખાસ કરીને મધ્ય અને ઉત્તર ગુજરાતમાં ગરમીની અસર વધુ વર્તાશે. અમદાવાદમાં તાપમાનનો પારો 38 ડિગ્રી સુધી પહોંચવાની ધારણા છે, જેના કારણે બપોરના સમયે કાળઝાળ ગરમીનો અનુભવ થશે.
દરિયાકાંઠાના વિસ્તારોમાં 'બફારો' વધશે
જ્યારે રાજ્યના આંતરિક ભાગોમાં સૂકી ગરમી પડશે, ત્યારે દરિયાકિનારાના જિલ્લાઓમાં ભેજનું પ્રમાણ વધવાને કારણે અસહ્ય બફારો રહેવાની શક્યતા છે. સુરત, વલસાડ અને ભાવનગર જેવા જિલ્લાઓમાં તાપમાન ભલે ઓછું દેખાય, પણ બફારાને કારણે લોકો પરસેવે રેબઝેબ થશે.
ભુજ સૌથી ગરમ
છેલ્લા 24 કલાકના આંકડા જોઈએ તો, કચ્છનું ભુજ 37.2 ડિગ્રી તાપમાન સાથે રાજ્યનું સૌથી ગરમ શહેર નોંધાયું છે. વેસ્ટર્ન ડિસ્ટર્બન્સ સક્રિય થવાને કારણે પવનોની દિશામાં ફેરફાર થયો છે, જે સીધી રીતે તાપમાનમાં વધારા માટે જવાબદાર છે.
રાજ્યમાં વેસ્ટર્ન ડિસ્ટર્બન્સની અસર જોવા મળી રહી છે. તેને કારણે આગામી 72 કલાકમાં તાપમાન 2-3 ડિગ્રી વધશે. દરિયાકાંઠાના વિસ્તારોમાં ભેજને કારણે બફારો અનુભવાશે, જ્યારે અમદાવાદ અને આસપાસના વિસ્તારોમાં ગરમીનું પ્રમાણ વધશે."