Video: રાસથી રંગુ તને, રોમ રોમે ગુંજતી ગુંજો વિશે રંગુ તને...સાંભળો રાજેન્દ્ર શુક્લની રચના

ગુજરાતી સાહિત્યના આકાશમાં પોતાની આગવી ઓળખ ઊભી કરનાર ઋષિકવિ રાજેન્દ્ર શુક્લની વિદાયથી ગઝલ અને કવિતાના ક્ષેત્રે એક યુગનો અંત આવ્યો છે.રાજેન્દ્ર શુક્લની વિદાય એટલે માત્ર એક કવિની વિદાય નથી; એ ગુજરાતી ભાષાની એક વિશિષ્ટ ચિંતનધારાની વિદાય છે.કવિઓ શબ્દોનું સર્જન કરે છે, પરંતુ કેટલાક કવિઓ શબ્દોને નવું જીવન આપે છે. રાજેન્દ્ર શુક્લ એવા સર્જક હતા. તેમણે ગઝલને હૃદયની લાગણીથી માંડીને આત્માની અનુભૂતિ સુધી પહોંચાડી.ગિરનારની ભૂમિમાંથી ઊગેલો આ કાવ્યસૂર હવે ભૌતિક રીતે આપણી વચ્ચે નથી, પરંતુ તેમનાં શબ્દો, ગઝલો અને કાવ્યચેતના ગુજરાતી સાહિત્યમાં સદાય જીવંત રહેશે.
રાજેન્દ્ર શુક્લ માત્ર ગઝલકાર નહોતા; તેઓ શબ્દના ઉપાસક, ભારતીય અધ્યાત્મના ચિંતક, સંસ્કૃતિના અભ્યાસી અને સંવેદનાના સૂક્ષ્મ પારખુ હતા. તેમની કલમમાં સૌરાષ્ટ્રની ધરતીની સુગંધ હતી, ગિરનારની ગહનતા હતી, ભારતીય દર્શનની ઊંડાઈ હતી અને માનવીના અંતરમનની અકથ્ય અનુભૂતિઓને અભિવ્યક્ત કરવાની અદભુત શક્તિ હતી.તેમનું સર્જન વાંચતાં સમજાય છે કે ગઝલ માત્ર પ્રેમ, વિરહ કે લાગણીઓની અભિવ્યક્તિ નથી; ગઝલ જીવન, અસ્તિત્વ, આત્મા અને પરમચેતનાની શોધનું માધ્યમ પણ બની શકે છે.














