Video: દિવાળી નિમિત્તે અમદાવાદ સિવિલ હોસ્પિટલમાં તબીબી સ્ટાફ બમણો

દિવાળી નિમિત્તે અમદાવાદ સિવિલ હોસ્પિટલમાં તબીબી સ્ટાફ બમણો

હાઈ એલર્ટ પર છે અમદાવાદ સિવિલની ઈમરજન્સી સેવાઓ!

કોઈપણ દુર્ઘટના સમયે દર્દીઓને સમયસર સારવાર મળે તે માટે તંત્ર દ્વારા આગોતરું આયોજન!

દિવાળી એટલે કે ખુશીઓ, રોશની અને પરિવાર સાથે ઉજવણીનો પાવન અવસર.. પરંતુ, આ ઉત્સવની વચ્ચે ક્યારેક એક નાનકડી બેદરકારી કોઈના જીવનમાં મોટો અંધકાર ફેલાવી શકે છે. ફટાકડા ફોડતી વખતે દાઝી જવાના બનાવો, આગ લાગવાની દુર્ઘટનાઓ કે પછી માર્ગ અકસ્માતના કિસ્સાઓ દિવાળીના દિવસોમાં વધી જવાની પૂરી શક્યતા રહે છે. આવી કોઈપણ સંભવિત ઈમરજન્સી પરિસ્થિતિમાં દર્દીઓને ત્વરિત અને ઉત્તમ સારવાર મળી રહે તથા કોઈ પરિવારને મુશ્કેલીનો સામનો ન કરવો પડે તે માટે અમદાવાદ સિવિલ હોસ્પિટલનું તંત્ર સંપૂર્ણપણે સજ્જ અને એલર્ટ મોડ પર આવી ગયું છે. દિવાળીના આ પાંચ દિવસો દરમિયાન જ્યારે સામાન્ય નાગરિકો પોતાના પરિવાર સાથે ઉત્સવની ઉજવણીમાં વ્યસ્ત હોય છે, ત્યારે સિવિલ હોસ્પિટલના તબીબો અને આરોગ્યકર્મીઓ દર્દીઓની સેવામાં ખડેપગે રહેતા હોય છે. દર વર્ષે તહેવારોમાં દાઝી જવાના અને ઈજા પામેલા દર્દીઓની સંખ્યા વધતી હોવાથી સિવિલ હોસ્પિટલના ઈમરજન્સી વિભાગમાં મેડિકલ સ્ટાફની સંખ્યા બમણી કરી દેવામાં આવી છે. સિવિલ હોસ્પિટલના સુપ્રિટેન્ડેન્ટ ડોક્ટર રાકેશ જોષીના જણાવ્યા અનુસાર, હોસ્પિટલમાં એકસાથે વધુ દર્દીઓ આવે તો પણ દરેકને ત્વરિત સારવાર મળી રહે તેવી સુનિશ્ચિત વ્યવસ્થા કરવામાં આવી છે.

તહેવારની અસલી ઉજવણી ફટાકડાના અવાજમાં નહીં, પરંતુ પરિવારની સુરક્ષા અને સાવચેતીમાં છે!

માત્ર માનવબળ જ નહીં, પરંતુ ઈમરજન્સી સારવાર માટે જરૂરી તમામ દવાઓ, ખાસ ઇન્જેક્શન્સ, ડ્રેસિંગ મટિરિયલ, અત્યાધુનિક મેડિકલ સાધનો અને અન્ય જીવનરક્ષક વસ્તુઓનો પૂરતો જથ્થો પણ અગાઉથી જ ઉપલબ્ધ રાખવામાં આવ્યો છે. દવાઓ કે સાધનોની અછતને કારણે દર્દીની સારવારમાં વિલંબ ન થાય તેની ખાસ તકેદારી રાખવામાં આવી છે. તબીબો માટે તહેવારની સાચી ખુશી કોઈ દર્દીનો અમૂલ્ય જીવ બચાવવામાં અને ઉદાસ ચહેરા પર ફરી સ્મિત લાવવામાં જ રહેલી છે. સિવિલ હોસ્પિટલ તંત્ર દ્વારા નાગરિકોને પણ નમ્ર અપીલ કરવામાં આવી છે કે દિવાળીના દીવડાઓ દરેકના જીવનમાં પ્રકાશ ફેલાવે અને કોઈ દુર્ઘટના ન ઘટે તે માટે સૌએ જાગૃત બનવું જરૂરી છે. ફટાકડા ફોડતી વખતે પૂરતી સાવચેતી રાખવી અનિવાર્ય છે, કારણ કે તહેવારનો સાચો આનંદ સુરક્ષિત ઉજવણીમાં જ છે. સિવિલ હોસ્પિટલની આ આગોતરી તૈયારીઓ અને તબીબોની ખડેપગે સેવા ચોક્કસપણે નાગરિકો માટે સુરક્ષાનું મોટું કવચ પૂરું પાડી રહી છે.