દિલ્હીમાં અભિનેત્રી Huma Qureshi ના પિતરાઈ ભાઈની હત્યા, આ બાબતે થયો હતો ઝઘડો

દિલ્હીના નિઝામુદ્દીન વિસ્તારમાં સ્કૂટર પાર્કિંગના વિવાદને લઈને બોલિવૂડ અભિનેત્રી હુમા કુરેશીના 42 વર્ષીય પિતરાઈ ભાઈ આસિફ કુરેશીની હત્યાનો મામલો સામે આવ્યો છે. પોલીસે જણાવ્યું કે આ ઘટના ગુરુવારે રાત્રે લગભગ 10:30 વાગ્યે નિઝામુદ્દીનના જંગપુરા ભોગલ લેનમાં બની હતી. હત્યાના બંને આરોપીઓની ધરપકડ કરવામાં આવી છે.

પોલીસે જણાવ્યું કે આસિફ કુરેશીનો ગુરુવારે મોડી રાત્રે સ્કૂટરને ગેટની સામે થી હટાવીને બાજુમાં મૂકવાને લઈને કેટલાક લોકો સાથે ઝઘડો થયો હતો. ત્યારબાદ આરોપીઓએ તેના પર ધારદાર હથિયારો વડે હુમલો કર્યો હતો. હુમલા બાદ આસિફને ગંભીર હાલતમાં નજીકની હોસ્પિટલમાં લઈ જવામાં આવ્યો, જ્યાં ડોક્ટરોએ તેને મૃત જાહેર કર્યો. આસિફની પત્ની અને સગાઓએ આરોપ લગાવ્યો કે આરોપીઓએ નાની વાત પર તેના પર નિર્દયતાથી હુમલો કર્યો હતો.

બંને આરોપીઓ સગા ભાઈઓ છે

દિલ્હી પોલીસે આ સંબંધમાં BNSSની કલમ 103(1)/3(5) હેઠળ FIR નોંધીને બંને આરોપીઓની ધરપકડ કરી છે. ધરપકડ કરાયેલા બંને આરોપીઓ સગા ભાઈઓ છે. આરોપીઓની ઓળખ 19 વર્ષીય ઉજ્જવલ અને 18 વર્ષીય ગૌતમ તરીકે થઈ છે. આરોપીઓ પણ આસિફ કુરેશીના ઘરની નજીક જ રહે છે. પોલીસે જણાવ્યું કે ઝઘડા દરમિયાન, એક આરોપીએ આસિફની છાતી પર નોકદાર વસ્તુ (પોકર) વડે હુમલો કર્યો, જેના કારણે તેનું મૃત્યુ થયું. આ મામલે આગળની તપાસ ચાલુ છે.

પાર્કિંગ વિવાદને લઈને અગાઉ પણ થયો હતો ઝઘડો

આસિફની પત્ની સાયનાઝ કુરેશીએ પોલીસને જણાવ્યું કે આરોપીઓએ અગાઉ પણ પાર્કિંગના વિવાદને લઈને તેની સાથે ઝઘડો કર્યો હતો. તેમણે જણાવ્યું કે ગુરુવારે જ્યારે આસિફ કામ પરથી પરત ફર્યો, ત્યારે તેણે પાડોશીનું સ્કૂટર ઘરના મુખ્ય ગેટની સામે ઊભેલું જોયું, જે બાદ તેણે તેને ત્યાંથી હટાવવા કહ્યું.

તેમણે આરોપ લગાવ્યો કે પાડોશીઓએ સ્કૂટરને ત્યાંથી હટાવવાને બદલે આસિફને ગાળો બોલવાનું શરૂ કર્યું અને પછી તેના પર ધારદાર હથિયારો વડે હુમલો કર્યો.