ટેરિફથી અર્થતંત્રને લાગશે મોટો ઝટકો! અર્થશાસ્ત્રીઓના અંદાજે વિકાસ દરમાં થઈ શકે છે 0.60 ટકાનો ઘટાડો

યુએસ રાષ્ટ્રપતિ ડોનાલ્ડ ટ્રમ્પ દ્વારા ભારત પર કુલ 50 ટકા ડયુટી લાદવાની જાહેરાત દેશના કુલ સ્થાનિક ઉત્પાદન (GDP) માટે આંચકો હોઈ શકે છે. અર્થશાસ્ત્રીઓ માને છે કે આનાથી ચાલુ નાણાકીય વર્ષમાં GDP વૃદ્ધિ દરમાં 35થી 60 બેસિસ પોઈન્ટનો ઘટાડો થઈ શકે છે. સ્થાનિક વપરાશમાં વધારો ચોક્કસપણે અર્થતંત્રને ટેકો આપશે પરંતુ આ પગલું હજુ આંચકો લાવશે. જેનાથી બચાવવા માટે સરકારે પગલાં ભરવા પડશે. 

HDFC બેંકના મુખ્ય અર્થશાસ્ત્રીએ કહ્યું હતું કે, "જો 50 ટકા ડયુટી લાદવામાં આવે છે, તો 6.3 ટકા વૃદ્ધિનો અમારા મૂળભૂત અંદાજમાં 40થી 60 બેસિસ પોઇન્ટનો ઘટાડો થઈ શકે છે. ટ્રમ્પ ડયુટીની અસર ચીન પર લાદવામાં આવેલી ડયુટી, રૂપિયાના અવમૂલ્યનની ગતિ અને સ્થાનિક અર્થતંત્રમાં સુધારો સહિત અનેક પાસાઓ પર આધારિત રહેશે."

મોર્ગન સ્ટેનલી રિસર્ચના વિશ્લેષણમાં કહેવામાં આવ્યું છે કે જો તમામ માલની નિકાસ પર 50 ટકા ડયુટી લાદવામાં આવે છે, તો તેની વૃદ્ધિ પર સીધી અસર 60 બેસિસ પોઈન્ટ થશે. આગામી 12 મહિનામાં પરોક્ષ અસર પણ લગભગ સમાન રહેશે. 

નાણાકીય વર્ષ 2025માં, ભારતની અમેરિકામાં કુલ નિકાસ 86.5 બિલિયન ડોલર હતી, જે GDPના 2.2 ટકા છે. ઘણા અર્થશાસ્ત્રીઓને આશા છે કે ટ્રમ્પની ટેરિફ જાહેરાત ટકશે નહીં અને 21 દિવસમાં બંને દેશો વચ્ચે કરાર થઈ શકે છે. પરંતુ આજની પરિસ્થિતિમાં, GDP વૃદ્ધિ ધીમી રહેશે. યુબીએસ સિક્યોરિટીઝના ચીફ ઇકોનોમિસ્ટે જણાવ્યું હતું કે, "આપણે ટ્રમ્પ ટેરિફની નોમિનલ GDP વૃદ્ધિ પરની અસરનું મૂલ્યાંકન કરવું જોઈએ કારણ કે તે કોર્પોરેટ આવક, લોન માંગ અને રાજકોષીય ખાતામાં વધારાની દૃષ્ટિએ મહત્ત્વપૂર્ણ છે."

જો વર્તમાન 50 ટકા વેપાર ડયુટી યથાવત રહે છે, તો નાણાકીય વર્ષ 2026 માટે ચાલુ ખાતાની ખાધ GDPના 0.8 ટકા હોવાનો અંદાજ પણ બગડી શકે છે. પછી તે 50 બેસિસ પોઇન્ટ સુધી વધી શકે છે. પરંતુ ચલણની દૃષ્ટિએ, મૂડી પ્રવાહ સૌથી મહત્ત્વપૂર્ણ રહેશે. 

બેંક ઓફ બરોડાના ચીફ ઇકોનોમિસ્ટે જણાવ્યું હતું કે, "જો કોઈ કરાર ન થાય અને નિકાસકારો માટે કોઈ પેકેજ ન મળે, તો ચાલુ નાણાકીય વર્ષમાં જીડીપી વૃદ્ધિ દર 40 બેસિસ પોઈન્ટ ઘટશે."

એક રિપોર્ટમાં અંદાજ લગાવવામાં આવ્યો છે કે જો નવી વધારાની ડયુટી લાગુ કરવામાં આવે છે, તો આ કેલેન્ડર વર્ષ માટે ભારતનો GDP વૃદ્ધિ દર 0.6 ટકા સુધી ઘટી શકે છે.