Business News: વિશ્વના વિવિધ દેશો દ્વારા સોનાની ખરીદીમાં નોંધપાત્ર વધારો, જાણો ખરીદીમાં ભારત કયા ક્રમે

વર્ષ 2025માં સોનાના ભાવમાં તીવ્ર વધારો થયો છે. શરૂઆતથી, સોનું લગભગ 48% જેટલું મોંઘુ થયું છે. આ પાછળના મુખ્ય કારણોમાં વિવિધ દેશોની મધ્યસ્થ બેંકો દ્વારા ખરીદી, વૈશ્વિક રાજકીય તણાવ અને વેપાર સંબંધિત અનિશ્ચિતતાઓ છે. સોનાને હંમેશા સલામત રોકાણ માનવામાં આવે છે કારણ કે તેનો સરળતાથી વેપાર થાય છે અને તે લાંબા સમયે ઘણું સારું વળતર આપે છે. આ બધા પરિબળો આ ધાતુના ભાવમાં સતત વધારો કરી રહ્યા છે.

ભારત ખરીદીમાં નવમાં ક્રમે

World Gold Council મુજબ, જુલાઈ 2025માં વિશ્વની કેન્દ્રીય બેંકો પાસે કુલ 36,359 ટન સોનું હતું.અમેરિકા પાસે સૌથી વધુ સોનું, આશરે 8,133 ટન, હતું. આ પછી જર્મની, આંતરરાષ્ટ્રીય નાણાકીય ભંડોળ, ઇટાલી અને ફ્રાન્સનો ક્રમ આવે છે. ભારત 888 ટન સાથે નવમા ક્રમે છે અને જાપાન 846 ટન સાથે 10મા ક્રમે છે.

ભારતે 2025માં અત્યાર સુધીમાં કુલ 3.8 ટન સોનું ખરીદ્યું છે. આમાં જાન્યુઆરીમાં 2.8 ટન, માર્ચમાં 0.6 ટન અને જૂનમાં 0.4 ટનનો સમાવેશ થાય છે. આનાથી ભારતના સોનાના ભંડારને વધુ મજબૂત બનાવવામાં આવ્યો છે અને તે દર્શાવે છે કે ભારત સોનાને સુરક્ષિત રોકાણ માને છે.

કયો દેશ કેટલું સોનું ધરાવે છે?

વર્લ્ડ ગોલ્ડ કાઉન્સિલના અહેવાલ મુજબ, ઓગસ્ટ 2025માં વિશ્વભરની મધ્યસ્થ બેંકોએ તેમના ભંડારમાં કુલ 15 ટન સોનું ઉમેર્યું હતું. કઝાકિસ્તાનની નેશનલ બેંક સતત છઠ્ઠા મહિનાથી સોનું ખરીદી રહી છે અને હવે કુલ ૩૧૬ ટન ધરાવે છે. બલ્ગેરિયાએ ઓગસ્ટમાં 2 ટન ઉમેર્યું હતું , જે જૂન 1997 પછીનો તેનો સૌથી મોટો માસિક વધારો છે. પીપલ્સ બેંક ઓફ ચાઇના પણ સતત 10મા મહિનાથી સોનું ખરીદી રહી છે. હવે તેની પાસે કુલ 2,300 ટનથી વધુ સોનું છે, જે તેના કુલ આંતરરાષ્ટ્રીય અનામતના 7 ટકા છે.