આજે SGB રિડેમ્પશનની અંતિમ તારીખ: રોકાણકારો માલામાલ, મળશે 325%નું બમ્પર રિટર્ન

ભારતીય રિઝર્વ બેન્ક (RBI)એ Sovereign Gold Bond (SGB) 2017-18 સિરીઝ-IVના ફાઇનલ રિડેમ્પશન પ્રાઇઝની જાહેરાત કરી છે. આ સિરીઝ હેઠળ ગોલ્ડ બોન્ડની અંતિમ રિડમ્પશન ડેટ 23 ઓક્ટોબર 2025 નક્કી કરવામાં આવી છે જેનો અર્થ રોકાણકારો હવે આ તારીખે પોતાના રોકાણના પુરા પૈસા પરત લઇ શકશે.

ભારતીય રિઝર્વ બેંક (RBI)એ બુધવારે જાહેરાત કરી હતી કે સોવરિન ગોલ્ડ બોન્ડ (SGB) 2017-18 સિરીઝ-IV માટે 23 ઓક્ટોબર, 2025 ના રોજ અંતિમ રિડેમ્પશન કિંમત ₹12,704 પ્રતિ ગ્રામ સોનું નક્કી કરવામાં આવી છે.

23 ઓક્ટોબર, 2025ના રોજ થનારી અંતિમ રિડેમ્પશન માટે રિડેમ્પશન કિંમત, રિડેમ્પશન તારીખથી પાછલા ત્રણ કાર્યકારી દિવસો એટલે કે 17 ઓક્ટોબર, 2025, 20 ઓક્ટોબર, 2025 અને 22 ઓક્ટોબર, 2025 ના 999 શુદ્ધતાના સોનાના બંધ ભાવની સાદી સરેરાશના આધારે SGBના પ્રતિ યુનિટ ₹12,704 રહેશે.

SGB રોકાણકારોને 325%નું સંપૂર્ણ વળતર મળશે

આ બોન્ડ મૂળ રૂપે 23 ઓક્ટોબર, 2017ના રોજ પ્રતિ ગ્રામ ₹2,987 ના ભાવે જારી કરવામાં આવ્યો હતો. પાકતી મુદત હવે ₹12,704 પર સ્થિર થતાં, રોકાણકારોને 325% નું સંપૂર્ણ વળતર મળશે.

સંપૂર્ણ વળતર 12,704 હજારમાંથી 2,987 માઇનસ કરતા 9,717 (વ્યાજ સિવાય) બરાબર થાય છે. આ 325%નું વળતર દર્શાવે છે, જેની ગણતરી (9,717 ÷ 2,987) × 100 થાય છે.

પરિપક્વતા પર SGB આપમેળે રોકાણકારના બેંક ખાતામાં જમા થઈ જાય છે. વધુમાં, રિડેમ્પશન દ્વારા વ્યક્તિઓ દ્વારા મેળવેલ કોઈપણ મૂડી લાભ કરમાંથી મુક્તિ પામે છે.

સોવરિન ગોલ્ડ બોન્ડ્સ (SGBs)એ સરકારી સિક્યોરિટીઝ છે જે સોનાના ગ્રામમાં હોય છે, જે ભૌતિક સોનાને રાખવાનો એક શ્રેષ્ઠ અને સલામત વિકલ્પ છે. ભૌતિક સોનાની માંગ ઘટાડવામાં મદદ કરવા માટે આ યોજના 2015માં રજૂ કરવામાં આવી હતી.

SGBs પ્રારંભિક રોકાણ રકમ પર વાર્ષિક 2.50% (નિશ્ચિત દર) વ્યાજ આપે છે. આ વ્યાજ તમારા બેંક ખાતામાં અર્ધ-વાર્ષિક રીતે જમા થાય છે, અને છેલ્લું વ્યાજ મુદ્દલ સાથે પરિપક્વતા પર ચૂકવવાપાત્ર રહેશે.

રિઝર્વ બેંક ઓફ ઈન્ડિયા (RBI) એ અહેવાલ આપ્યો છે કે 2025-26ના પહેલા છ મહિનામાં તેનો સોનાનો ભંડાર 880 મેટ્રિક ટનથી વધુ થઈ ગયો છે. 26 સપ્ટેમ્બર, 2025 સુધીમાં, સોનાનું મૂલ્ય USD 95 બિલિયન હતું.

વૈશ્વિક અનિશ્ચિતતા દરમિયાન લોકો સુરક્ષિત રોકાણ તરીકે સોના તરફ વળ્યા હોવાથી તાજેતરમાં સોનાની માંગ વધી રહી છે.RBI બુલેટિન અનુસાર, ચાલુ આર્થિક અને ભૂ-રાજકીય તણાવને કારણે આંતરરાષ્ટ્રીય સોનાના ભાવમાં વધારો થયો છે, જેના કારણે મધ્યસ્થ બેંકો અને રોકાણકારો બંને વધુ સોનું ખરીદવા લાગ્યા છે. આ વૈશ્વિક વલણને કારણે સ્થાનિક સોનાના ભાવમાં પણ વધારો થયો છે.