શેરબજાર લાલ નિશાન સાથે બંધ, સેન્સેક્સ 539 પોઇન્ટ ગગડ્યો, નિફ્ટીએ ગુમાવી મહત્ત્વની સપાટી
છેલ્લું અપડેટ : 27 Aug 2026
શેરબજારમાં શરૂઆતથી અંત સુધી રસાકસી જોવા મળી અને શેરબજાર બંધ થવાના સમયે મોટાભાગના રોકાણકારોના પોર્ટફોલિયોનો રંગ લાલ થઈ ગયો એટલે કે મંદી ઘેરી વળી. કેટલાક શેરોએ બજારને સંભાળવાનો પ્રયાસ ચોક્કસ કર્યો, પરંતુ એચડીએફસી બેન્ક, હિન્ડાલ્કો અને ઓટો શેરોના ઘટાડા સામે તેમનો પ્રયાસ સફળ ન થયો. કામકાજના અંતે સેન્સેક્સ 539 પોઈન્ટ ગગડીને 76,933 પર બંધ થયો. નિફ્ટી 117 પોઈન્ટ તૂટીને 24,091 પર આવી ગયો. એટલે કે નિફ્ટીએ 24,100 ની મહત્વપૂર્ણ સપાટી પણ ગુમાવી દીધી. આજે બજાર એક સપ્તાહના નીચલા સ્તરે બંધ થયું અને માર્કેટ બ્રેડ્થ સંપૂર્ણપણે ઘટી રહેલા શેરોના પક્ષમાં રહી.
બેન્કિંગ સેક્ટરમાં એચડીએફસી બેન્ક બન્યો સૌથી મોટો વિલન
બજાર પર સૌથી વધુ દબાણ એચડીએફસી બેન્કના શેરોએ બનાવ્યું. બેન્કનો શેર ઘટીને ચાર વર્ષના નીચલા સ્તરે પહોંચી ગયો. એચડીએફસી બેન્કનું નિફ્ટી અને નિફ્ટી બેન્કમાં ઘણું મોટું વેઇટેજ છે. આ વેઇટેજનો અર્થ ઈન્ડેક્સમાં કોઈ શેરની ભાગીદારી અથવા તેની અસર છે. જ્યારે વધુ વેઇટેજ ધરાવતો એચડીએફસી બેન્ક ઘટે છે, ત્યારે ભલે કેટલાક અન્ય બેન્ક શેર ઉપર હોય, તો પણ નિફ્ટી અને નિફ્ટી બેન્ક પર દબાણ રહે છે. આ જ કારણ રહ્યું કે નિફ્ટી બેન્ક 274 પોઈન્ટ ઘટીને 57,510 પર બંધ થયો.
એચડીએફસી બેન્કનો શેર સતત દબાણમાં છે. કાનૂની, રેગ્યુલેટરી અને લીડરશિપ સંબંધિત પ્રશ્નોએ પણ રોકાણકારોની ચિંતા વધારી છે. એક અહેવાલ પ્રમાણે બેન્કે અમેરિકામાં નોંધાયેલા ક્લાસ-એક્શન મુકદ્દમાને પાયાવિહોણો ગણાવતા મજબૂતીથી પોતાનો બચાવ કરવાની વાત કહી છે.
જોકે બેન્કિંગ સેક્ટરની સ્થિતિ સંપૂર્ણપણે ખરાબ નહોતી. કોટક મહીન્દ્રા બેન્કે બુધવારની તેજીને આગળ વધારી. શેર આ સપ્તાહે અત્યાર સુધીમાં આશરે 5% વધ્યો છે. એટલે કે જ્યાં એચડીએફસી બેન્કે બેન્કિંગ ઈન્ડેક્સને નીચે ખેંચ્યો, ત્યાં કોટક મહીન્દ્રા બેન્કે થોડો સપોર્ટ આપવાનો પ્રયાસ કર્યો.
મેટલ અને ઓટો શેરોએ દબાણ વધાર્યું
નિફ્ટીમાં સૌથી વધુ ઘટાડો હિન્દાલ્કોમાં જોવા મળ્યો. ગ્લોબલ મેટલના ભાવોમાં નબળાઈની સીધી અસર શેર પર પડી અને તે નિફ્ટીનો ટોપ લૂઝર બની ગયો. મેટલ કંપનીઓની કમાણી તાંબુ, એલ્યુમિનિયમ અને અન્ય કોમોડિટી પ્રોડક્ટ્સની કિંમતો સાથે જોડાયેલી હોય છે. જ્યારે મેટલની કિંમતો ઘટે છે, ત્યારે બજારને ડર લાગે છે કે કંપનીના વેચાણ અને માર્જિન પર દબાણ આવી શકે છે. આ જ ચિંતામાં રોકાણકારોએ હિન્ડાલ્કોના શેર વેચ્યા.
ઓટો શેરોની ગાડી પણ આખો દિવસ રિવર્સ ગિયરમાં રહી. મોટાભાગના ઓટો સ્ટોક્સ લાલ નિશાનમાં બંધ થયા અને મહીન્દ્રા એન્ડ મહીન્દ્રા આ સેક્ટરનો મોટો લૂઝર રહ્યો.
સોના-ચાંદીવાળા શેરોમાં ઉલટું ચિત્ર
ગોલ્ડ લોન આપતી મૂથુટ ફાઇનાન્સ અને મણ્ણપુરમ ફાઇનાન્સના શેરોમાં 4-5% નો મોટો ઘટાડો આવ્યો. બીજી તરફ જ્વેલરી કંપનીઓના શેરોમાં ખરીદી જોવા મળી. જ્વેલરી શેરોમાં તેજીનું કારણ કસ્ટમ્સ ડ્યુટી ઘટવા સંબંધિત અહેવાલો રહ્યા. કસ્ટમ્સ ડ્યુટી એટલે વિદેશથી મંગાવવામાં આવતા સામાન પર લાગતો ટેક્સ. જો સોના પર કસ્ટમ્સ ડ્યુટી ઘટે છે, તો જ્વેલરી કંપનીઓ માટે સોનાની આયાત પડતર ઓછી થઈ શકે છે. આનાથી માંગ અને માર્જિનને ફાયદો મળવાની આશા ઊભી થાય છે. જોકે, ડ્યુટી કટના સમાચારથી ગોલ્ડ લોન કંપનીઓ પર દબાણ કેમ વધ્યું, તે આગામી સમયમાં આવનારી પોલિસીની સંપૂર્ણ વિગતો અને સોનાની કિંમતોની પ્રતિક્રિયાથી વધુ સ્પષ્ટ થશે.
અદાણી એન્ટરપ્રાઇઝ આશરે 2% વધીને બંધ થયો. ભેલમાં સારા વોલ્યુમ સાથે 4% થી વધુની તેજી આવી. અમેરિકા સરકારના એક ઓર્ડર બાદ ઇક્વિપમેન્ટ બનાવતી કંપનીઓમાં ખરીદી જોવા મળી. સી.જી પાવર આશરે 4% વધી ગયો. આનાથી આખા નબળા બજારમાં કેપિટલ ગુડ્સ અને ઇક્વિપમેન્ટ શેરોએ બજારને વધારે તૂટતું બચાવ્યું હતું.
