Stock Market: સેન્સેક્સમાં 965 પોઈન્ટનો ઉછાળો, નિફ્ટી 24,334ની સપાટીને પાર; IT-બેન્કિંગ અને ઓટો શેરો ચમક્યા
છેલ્લું અપડેટ : 17 Jul 2026
ગ્લોબલ માર્કેટમાં મંદી છવાયેલી હોવા છતાં ભારતીય શેરબજારે શુક્રવારે શાનદાર વાપસી કરી. શાનદાર ત્રિમાસિક પરિણામો, આઇટી, ઓટો અને બેન્કિંગ શેરોમાં જોરદાર લેવાલી (ખરીદી), મજબૂત થતા રૂપિયા અને ટેકનિકલ સુધારાના દમ પર ભારતીય બજારોએ દુનિયાભરના નબળા સંકેતોને બાજુ પર મૂકી દીધા. આ જોરદાર ઉછાળાને કારણે શેરબજાર બંધ થવા સુધીમાં રોકાણકારોની સંપત્તિમાં આશરે ₹35,282 કરોડનો વધારો થયો. બીએસઇમાં લિસ્ટેડ કંપનીઓનું કુલ માર્કેટ કેપ વધીને ₹4,80,90,232.60 કરોડ પર પહોંચી ગયું, જે તેના અગાઉના ટ્રેડિંગ સત્રમાં ₹4,80,54,950.75 કરોડ હતું.
આંકડાઓની વાત કરીએ તો, શુક્રવારે બીએસઇનો ઇન્ડેક્સ સેન્સેક્સ 964.58 પોઇન્ટ એટલે કે 1.25 ટકાના ભારે ઉછાળા સાથે 78,151.45 ના સ્તર પર બંધ થયો. બીજી તરફ, એનએસઇનો નિફ્ટી50 પણ 261.55 પોઇન્ટ એટલે કે 1.09 ટકાની બઢત સાથે 24,334.30 ના સ્તર પર સ્થિર થયો.
ટેક મહિન્દ્રા અને કોટક બેંકે મારી બાજી
ફાર્મા શેરોમાં ઘટાડોબજારમાં ચોતરફ લેવાલી (ખરીદી) વચ્ચે સેન્સેક્સની કંપનીઓમાં ટેક મહિન્દ્રા સૌથી વધુ 3.88 ટકાના વધારા સાથે ટોપ ગેનર રહ્યો. ત્યારપછી કોટક મહિન્દ્રા બેંકમાં 3.67 ટકા, ટીસીએસમાં 2.92 ટકા, રિલાયન્સ ઇન્ડસ્ટ્રીઝમાં 2.78 ટકા અને આઇસીઆઇસીઆઇ બેન્ક બેંકમાં 2.59 ટકાનો ઉછાળો જોવા મળ્યો.
નફો કમાવનારા અન્ય અગ્રણી શેરોમાં હિન્દુસ્તાન યુનિલિવર, એક્સિસ બેંક, મહિન્દ્રા એન્ડ મહિન્દ્રા, બજાજ ફાઇનાન્સ અને એચડીએફસી બેંક સામેલ રહ્યા. બીજી તરફ ટ્રેન્ટના શેરોમાં 0.68 ટકાનો ઘટાડો આવ્યો, જ્યારે ભારતી એરટેલ, અલ્ટ્રાટેક સિમેન્ટ, ઇન્ડિગો અને એનટીપીસીના શેર પણ લાલ નિશાન પર બંધ થયા.
સેક્ટરના હિસાબે જોઈએ તો નિફ્ટી પ્રાઇવેટ બેંકમાં 2.12 ટકા અને નિફ્ટી આઇટીમાં 1.75 ટકાની તેજી રહી. નિફ્ટી બેંક 1.63 ટકા અને નિફ્ટી રિયાલ્ટી 1.38 ટકા વધીને બંધ થયા. જોકે, નિફ્ટી ફાર્મામાં 1.40 ટકાનો ઘટાડો નોંધાયો, જ્યારે હેલ્થકેર, મેટલ્સ અને સ્મોલ તેમજ મિડકેપ ઇન્ડેક્સ નુકસાનમાં રહ્યા.
રિલાયન્સ ઇન્ડસ્ટ્રીઝના સ્ટોકમાં 2% કરતા વધુનો વધારો થયો, જેના કારણે સેન્સેક્સ અને નિફ્ટીમાં પણ તેજી આવી. કંપની શુક્રવારે બજાર બંધ થયા પછી નાણાકીય વર્ષ 2027 ના પ્રથમ ત્રિમાસિક ગાળાના (Q1) પરિણામો જાહેર કરે તેવી અપેક્ષા હોવાથી રોકાણકારો પોઝિટિવ હતા. નિષ્ણાતોનું માનવું છે કે રિલાયન્સના ઓઇલ ટુ કેમિકલ (O2C) બિઝનેસમાં સુધારો અને ડિજિટલ સેવાઓ (જિયો) ના બિઝનેસમાં સતત વૃદ્ધિના કારણે કંપનીનો નફો સ્થિર રહેશે.
નિફ્ટી 50 ના ટોપ ગેનર્સ અને લૂઝર્સ
નિફ્ટી 50 ની કંપનીઓમાં સૌથી વધુ વધારો ટેક મહિન્દ્રામાં જોવા મળ્યો, જેમાં 4.15 ટકાનો ઉછાળો નોંધાયો. ત્યારપછી, કોટક બેંકમાં 3.40 ટકાનો વધારો, જિયો ફાઇનાન્શિયલ સર્વિસીસમાં 3.12 ટકાનો વધારો, TCSમાં 3.09 ટકાનો વધારો અને રિલાયન્સ ઇન્ડસ્ટ્રીઝમાં 2.37 ટકાનો સાધારણ વધારો જોવા મળ્યો.નિફ્ટી 50 ની કંપનીઓમાં સૌથી વધુ નુકસાન હિંડાલ્કોને થયું, જેમાં 1.58 ટકાનો ઘટાડો જોવા મળ્યો. આ પછી, ડૉ. રેડ્ડીઝમાં 1.08 ટકાનો ઘટાડો, વિપ્રોમાં 0.98 ટકાનો ઘટાડો, સન ફાર્મામાં 0.90 ટકાનો ઘટાડો અને મેક્સ હેલ્થકેરમાં 0.76 ટકાનો ઘટાડો જોવા મળ્યો.
બજારનો વ્યાપ નબળો રહ્યો
મુખ્ય સૂચકાંકોમાં વધારો હોવા છતાં, બજારનો વ્યાપ નબળો રહ્યો હતો. 'એડવાન્સ-ડિક્લાઈન' રેશિયો 2:3 રહ્યો, જેનો અર્થ છે કે વધનારા શેરોની સરખામણીમાં ઘટનારા શેરોની સંખ્યા વધુ હતી. મિડકેપ સૂચકાંક 259 પોઈન્ટ ઘટીને 62,428 પર બંધ થયો.