ZOMATO પરથી ખાવાનું મંગાવવું મોંઘુ થયું, તહેવારોની સીઝન પહેલા આ ચાર્જમાં 20 ટકાનો વધારો

ઓનલાઈન ફૂડ ડિલિવરી એપ ZOMATO લોકોમાં ખૂબ જ લોકપ્રિય ફૂડ ડિલિવરી એપ છે. જ્યારે પણ ફૂડ ઓર્ડર કરવાની વાત આવે છે, ત્યારે મોટાભાગના લોકો તેમના ફોન પર ઝોમેટો એપ ખોલે છે પરંતુ હવે ઝોમેટોએ તેના પ્લેટફોર્મ ફીમાં 20 ટકાનો વધારો કરીને ગ્રાહકોને ચોંકાવી દીધા છે. જેને પગલે હવે લોકોએ ઝોમેટોમાંથી ખોરાક મંગાવવા માટે પહેલા કરતા વધુ પૈસા ચૂકવવા પડશે.

ઝોમેટોએ પ્લેટફોર્મ ફી વધારી
ઓનલાઈન ફૂડ ડિલિવરી એપ ઝોમેટોએ ગઈકાલે એટલે કે 2 સપ્ટેમ્બરના રોજ તેની પ્લેટફોર્મ ફીમાં 20 ટકાનો વધારો કર્યો છે. અત્યાર સુધી ઝોમેટોની પ્લેટફોર્મ ફી 10 રૂપિયા હતી, જે હવે વધીને 12 રૂપિયા થઈ ગઈ છે. આવી સ્થિતિમાં, હવે ગ્રાહકોએ દરેક ઓર્ડર પર પ્લેટફોર્મ ફી તરીકે 12 રૂપિયા ચૂકવવા પડશે.

ઝોમેટોની પ્લેટફોર્મ ફીમાં સતત વધારો
ઝોમેટોએ તેના પ્લેટફોર્મ ફીમાં વધારો એવા સમયે કર્યો છે જ્યારે આગામી મહિનાઓ તહેવારોથી ભરેલા રહેશે. જણાવી દઈએ કે આ પહેલી વાર નથી જ્યારે ઝોમેટોએ તેના પ્લેટફોર્મ ફીમાં વધારો કર્યો હોય. અગાઉ ઝોમેટોએ વર્ષ 2024માં તહેવારોની સીઝન પહેલા તેની પ્લેટફોર્મ ફીમાં પણ વધારો કર્યો હતો. આ સમય દરમિયાન ઝોમેટોએ તેની પ્લેટફોર્મ ફી વધારીને 10 રૂપિયા કરી હતી. જણાવી દઈએ કે વર્ષ 2023માં, ઝોમેટોની પ્લેટફોર્મ ફી ફક્ત 2 રૂપિયા હતી, જે હવે વધીને 12 રૂપિયા થઈ ગઈ છે.

ઝોમેટો એપ ફૂડ ડિલિવરી અને ક્વિક કોમર્સ કંપની ઇટરનલ લિમિટેડ દ્વારા ચલાવવામાં આવે છે. બ્લિંકિટ એપ પણ ઇટરનલ લિમિટેડ દ્વારા ચલાવવામાં આવે છે.