રેકોર્ડ હાઈ પરથી નીચે પટકાયું ભારતનું ફોરેક્સ રિઝર્વ, એક જ સપ્તાહમાં 6.7 અબજ ડોલરનો ઘટાડો

વિદેશી મુદ્રા ભંડાર 6.7 અબજ ડોલર ઘટીને 717.06 અબજ ડોલર પર પહોંચ્યું છે. સોનાના ભંડારમાં 14 અબજ ડોલરનો ઘટાડો નોંધાયો છે, જોકે વિદેશી મુદ્રા અસ્કયામતો (FCA) માં વધારો જોવા મળ્યો છે.

ભારતીય અર્થતંત્ર માટે 'સુરક્ષા કવચ' ગણાતા વિદેશી મુદ્રા ભંડારમાં ગયા સપ્તાહની ઐતિહાસિક તેજી બાદ હવે ઘટાડો નોંધાયો છે. ભારતીય રિઝર્વ બેંક (RBI) દ્વારા શુક્રવારે જાહેર કરવામાં આવેલા તાજેતરના આંકડા મુજબ, 6 ફેબ્રુઆરીએ પૂરા થયેલા સપ્તાહમાં દેશનું વિદેશી મુદ્રા ભંડાર 6.711 અબજ ડોલર ઘટીને 717.064 અબજ ડોલર રહ્યું છે.

આ ઘટાડો એટલા માટે મહત્ત્વપૂર્ણ છે કારણ કે તેના બરાબર અગાઉના સપ્તાહમાં વિદેશી મુદ્રા ભંડારમાં 14.361 અબજ ડોલરનો જંગી ઉછાળો આવ્યો હતો અને તે 723.774 અબજ ડોલરની તેની સર્વકાલીન ઉચ્ચ સપાટીએ પહોંચી ગયું હતું. તાજા આંકડાઓમાં આવેલો આ ઘટાડો મુખ્યત્વે સોનાના ભંડારના મૂલ્યમાં થયેલા મોટા ઘટાડાને કારણે છે, જ્યારે બીજી તરફ વિદેશી મુદ્રા અસ્કયામતોમાં વધારો જોવા મળ્યો છે.