Gold Silver price today: ચાંદી ઓલટાઈમ હાઈસપાટીએ પહોંચી, સોનામાં પણ તેજીનો માહોલ, જાણો નવો ભાવ
છેલ્લું અપડેટ : 19 Jan 2026
Gold Silver price today: કોમોડિટી માર્કેટમાં આજે ચાંદીએ તમામ રેકોર્ડ તોડી નાખ્યા છે. MCX (મલ્ટી કોમોડિટી એક્સચેન્જ) પર ચાંદીના ભાવમાં આજે અત્યાર સુધીનો સૌથી મોટો એક દિવસીય ઉછાળો જોવા મળ્યો છે. રોકાણકારો માટે આ એક આશ્ચર્યજનક દિવસ સાબિત થયો છે કારણ કે ચાંદીની કિંમતોમાં અચાનક 22,000નો વધારો જોવા મળ્યો છે.
ભાવમાં મોટો વધારો: ચાંદીના ભાવમાં એક જ દિવસમાં ₹22,000થી વધુનો તોતિંગ વધારો નોંધાયો
ટકાવારીમાં ઉછાળો: પાછલા બંધ ભાવની સરખામણીએ આજે ચાંદી 7.66% જેટલી ઉછળી
નવી સપાટી: ચાંદીનો વર્તમાન ભાવ 19 જાન્યુઆરી રાત્રિના 11 કલાક સુધી ₹3,10,000 પ્રતિ કિલોની ઐતિહાસિક સપાટી પર ટ્રેડ થયો
દિવસની વધઘટ: આજે ચાંદી ₹2,93,100 પર ઓપન થઈ હતી અને જોતજોતામાં ₹3,10,944થી વધુની હાઈ સપાટીને સ્પર્શી ગઈ
સોનામાં પણ તેજીનો માહોલ
માત્ર ચાંદી જ નહીં, સોનામાં પણ પોઝિટિવ ટ્રેન્ડ જોવા મળી રહ્યો છે. સોનું આજે ₹2,938 (2.06%)ના ઉછાળા સાથે ₹1,45,455 ના સ્તર પર ટ્રેડ કરી રહ્યું છે. જોકે, સોનાની સરખામણીએ ચાંદીમાં આવેલી તેજીએ બજારના નિષ્ણાતોને પણ ચોંકાવી દીધા છે.
નિષ્ણાતોનું શું કહેવું છે?
બજારના વિશ્લેષકો મુજબ, વૈશ્વિક અનિશ્ચિતતા અથવા મોટા આર્થિક ફેરફારોને કારણે સુરક્ષિત રોકાણ તરીકે કિંમતી ધાતુઓની માંગમાં આકસ્મિક વધારો થયો હોય તેવું જણાય છે. ખાસ કરીને ચાંદીમાં આવેલો આ 7% થી વધુનો ઉછાળો ટૂંકા ગાળામાં રોકાણકારોને માલામાલ કરી દેનારો સાબિત થયો છે.
માત્ર 30 દિવસમાં 1 લાખની તેજી
ચાંદીની કિંમતોમાં આવેલી તેજી એટલી ઝડપી છે કે, રોકાણકારો પણ સ્તબ્ધ છે. બરાબર એક મહિના પહેલા એટલે કે 19 ડિસેમ્બર-2025ના રોજ ચાંદીનો ભાવ 2,03,500 રૂપિયા હતો. આમ, માત્ર 30 દિવસમાં જ ચાંદી 1,00,000 રૂપિયા મોંઘી થઈ છે. છેલ્લા ત્રણ મહિનામાં જે રોકાણકારોએ ચાંદીમાં નાણાં રોક્યા હતા, તેમને બમ્પર વળતર મળ્યું છે.
ચાંદીમાં તેજીના 3 મુખ્ય કારણો
ઔધોગિક માંગ: સોલર, ઈલેક્ટ્રોનિક્સ અને EV ક્ષેત્રમાં હાલ ચાંદીનો ભરપૂર ઉપયોગ થઈ રહ્યો છે જેથી જ્વેલરી ઉપરાંત ચાંદી હવે કાચો માલ બની ગઈ છે
ટ્રમ્પ ટેરિફ: અમેરિકાની કંપનીઓ હાલ ટ્રમ્પની ટેરિફની ધમકીઓ વચ્ચે મોટી માત્રામાં ચાંદીનો સ્ટોક જમા કરી રહી છે. જેથી વૈશ્વિક પુરવઠામાં ચાંદીની અછત સર્જાઈ છે
ઉત્પાદકોને ડર: ઉત્પાદન બંધ થશે તેવો ડર સતત ઉત્પાદકોને લાગી રહ્યો છે, જેથી તે પોતાના ઉત્પાદન માટે જરૂરિયાત સિવાય પણ ચાંદી ખરીદી રહ્યા છે. જેથી આવનારા મહિનામાં પણ ચાંદી ચમકતી રહેશે.
સોનામાં તેજીના 3 મુખ્ય કારણો
ડોલર નબળો પડ્યો: અમેરિકામાં વ્યાજદરો ઘટતા ડોલર નબળો પડ્યો તેમજ સોનાનો હોલ્ડિંગ ખર્ચ ઓછો થયો જેનાથી લોકો ખરીદવા લાગ્યા
યુદ્ધ જેવી સ્થિતિ: રશિયા-યુક્રેન યુદ્ધ અને વિશ્વમાં વધતા તણાવને કારણે, રોકાણકારો સોનાને સૌથી સુરક્ષિત રોકાણ ગણી ખરીદી રહ્યા છે
રિઝર્વ બેન્ક: ચીન જેવા દેશમાં રિઝર્વ બેન્કમાં મોટા પાયે સોનું ભરાઈ રહ્યું છે, વર્ષમાં અંદાજિત 900 ટનથી વધુ સોનું ખરીદવામાં આવ્યું છે એટલે ભાવ વધી રહ્યા છે.
