કરોડોના TVS સામ્રાજ્યમાં સંપત્તિનો જંગ! પુત્રની તરફેણનો આરોપ લગાવી પુત્રીએ પિતાને મોકલી નોટિસ

દેશના જાણીતા ઓટોમોબાઈલ સમૂહ ટીવીએસ (TVS) ગ્રુપના પ્રમોટર પરિવારમાં આંતરિક વિખવાદ વધુ ઘેરો બન્યો છે. ટીવીએસ મોટરના ચેરમેન એમેરિટસ વેણુ શ્રીનિવાસનની પુત્રી લક્ષ્મી વેણુએ હિન્દુ ઉત્તરાધિકાર અધિનિયમ (Hindu Succession Act) હેઠળ સંયુક્ત પરિવારની સંપત્તિમાં પોતાનો કાયદેસરનો હિસ્સો મેળવવા માટે પિતાને સત્તાવાર વિભાજન (પાર્ટીશન) નોટિસ મોકલી છે. આ વિવાદમાં એક તરફ વેણુ શ્રીનિવાસન અને તેમના પુત્ર સુદર્શન વેણુ છે, તો બીજી તરફ લક્ષ્મી વેણુ અને તેમના માતા મલ્લિકા શ્રીનિવાસન એકસાથે ઊભા છે.
પુત્રની તરફેણ અને પિતૃસત્તાક વલણનો આક્ષેપ
લક્ષ્મીએ પોતાની નોટિસમાં દાવો કર્યો છે કે 2005માં સુધારેલા હિન્દુ ઉત્તરાધિકાર અધિનિયમ મુજબ સંયુક્ત પરિવારની મિલકતમાં પુત્રીઓને પણ પુત્રો જેટલો જ સમાન અધિકાર છે. તેમણે આક્ષેપ કર્યો છે કે પરિવારની સંપત્તિનો લાભ તેમના ભાઈ સુદર્શન વેણુની તરફેણમાં કેન્દ્રિત કરવામાં આવ્યો છે અને તેમને કાયદેસરના હકથી વંચિત રાખવામાં આવ્યા છે.
લક્ષ્મીએ સ્પષ્ટ શબ્દોમાં કહ્યું કે, "કાયદામાં અને પ્રગતિશીલ ભારતમાં પિતૃસત્તાક વલણને કોઈ સ્થાન નથી." તેમણે એવી પણ દલીલ કરી કે વર્ષ 2020માં ટીવીએસ ગ્રુપના મોટા પરિવાર વચ્ચે થયેલી સમજૂતીમાં વેણુ શ્રીનિવાસનની શાખાની મિલકતોની આંતરિક વહેંચણી થઈ ન હતી, અને માત્ર મેનેજમેન્ટના હોદ્દા આપવાથી સંપત્તિની માલિકીનો હક પૂરો થઈ જતો નથી.
માતા મલ્લિકા શ્રીનિવાસનનું પુત્રીને ખુલ્લું સમર્થન
ટ્રેક્ટર ઉત્પાદક કંપની TAFE ના ચેરમેન અને એમડી મલ્લિકા શ્રીનિવાસને પુત્રી લક્ષ્મીની માંગને મજબૂત ટેકો આપ્યો છે. તેમણે જણાવ્યું કે, "એક માતા તરીકે મારા માટે પુત્ર અને પુત્રી દરેક રીતે સમાન છે. હું માનું છું કે પરિવારની મિલકતમાં લક્ષ્મીનો કાયદેસરનો હિસ્સો છે, જે સુદર્શન કરતાં જરાય ઓછો નથી." મલ્લિકાએ એવી પણ સ્પષ્ટતા કરી કે TAFE કંપની અમાલગમેશન્સ (Amalgamations) ગ્રુપનો હિસ્સો છે, તેથી તેને વેણુ શ્રીનિવાસન પરિવારની સંપત્તિની વહેંચણીમાં ગણવી જોઈએ નહીં.
કઈ કંપનીઓની સંપત્તિ પર વિવાદ અને કાનૂની તૈયારીઓ
લક્ષ્મીએ વીએસ ટ્રસ્ટ (VS Trust) અને અન્ય હોલ્ડિંગ કંપનીઓ મારફતે ધરાવાતા હિસ્સાની વહેંચણી માંગી છે, જેમાં ટીવીએસ હોલ્ડિંગ્સ, ટીવીએસ મોટર કંપની, ટીવીએસ ક્રેડિટ સર્વિસીસ અને સુંદરમ-ક્લેટોનનો સમાવેશ થાય છે. અગાઉ 13 ઓક્ટોબરે વેણુ શ્રીનિવાસને નિવેદન આપ્યું હતું કે તેમણે પરિવાર સાથે પરામર્શ કરીને પારદર્શક રીતે બંને સંતાનો વચ્ચે વહેંચણી કરી હતી.
જોકે, આ વિવાદ કોર્ટમાં પહોંચે તે પહેલાં જ ઓક્ટોબર મહિનામાં વેણુ શ્રીનિવાસન, મલ્લિકા, લક્ષ્મી અને સુદર્શન ચારેય સભ્યોએ ચેન્નાઈની સિવિલ અને કોમર્શિયલ કોર્ટમાં 'કેવિએટ' (Caveat) દાખલ કરી દીધી છે, જેથી કોઈ પણ પક્ષની રજૂઆત સાંભળ્યા વિના કોર્ટ એકતરફી આદેશ ન આપે.











