iPhone: હવે નેટવર્ક વગર પણ મોકલી શકાશે મેસેજ, આવશે નવું ફિચર જે યુઝર્સને આપશે વધુ સુવિધા
છેલ્લું અપડેટ : 11 Nov 2025
iPhone યુઝર ટૂંક સમયમાં મોબાઇલ નેટવર્ક વિના પણ મેસેજ મોકલી શકશે અને Apple Mapsનો ઉપયોગ કરી શકશે. Apple એક નવી સેટેલાઇટ કનેક્ટિવિટી ફિચર પર કામ કરી રહ્યું છે, જેના દ્વારા યુઝર્સને દૂરના વિસ્તારોમાં અથવા નેટવર્ક ન હોય ત્યારે પણ કનેક્ટેડ રહેવાની સુવિધા મળશે.
કેમ લાવવામાં આવી રહ્યું છે આ ફિચર?
Appleનું આ નવું અપડેટ મુખ્યત્વે કટોકટીની પરિસ્થિતિઓમાં મદદ કરવા માટે લાવવામાં આવી રહ્યું છે. 2022માં લોન્ચ કરાયેલ iPhone 14 સિરીઝ સાથે, Appleએ સેટેલાઇટ-આધારિત SOS મેસેજ ફિચર આપ્યું હતુ. આ યુઝર્સને નેટવર્ક ન હોય તેવા સ્થળોએ પણ કટોકટી સેવાઓ અથવા સંપર્કો સાથે કનેક્ટ થવા દે છે. પછી કંપનીએ બ્રેકડાઉનના કિસ્સામાં મદદ કરવા માટે રોડસાઇડ અસિસ્ટેંસ ફિચર પણ ઉમેર્યું હતુ. હવે Apple આ ટેકનોલોજીને આગલા સ્તર પર લઈ જવા માંગે છે અને મેસેજ તેમજ Apple Maps જેવી એપ્લિકેશનોમાં સેટેલાઇટ કનેક્શનની સુવિધા આપવા માંગે છે.
કેવી રીતે કામ કરશે આ સેટેલાઇટ ફિચર?
અહેવાલો અનુસાર, Apple આ નવા ફિચર માટે અદ્યતન સેટેલાઇટ ટેકનોલોજી પર કામ કરી રહી છે. કંપનીએ ગ્લોબલસ્ટાર નામના સેટેલાઇટ ઓપરેટર સાથે ભાગીદારી કરી છે. આ એ જ કંપની છે જે Appleના ઇમરજન્સી SOS સુવિધાને સપોર્ટ કરે છે. બંને કંપનીઓ હવે એક એવી સિસ્ટમ પર સાથે મળીને કામ કરી રહી છે જેમાં યુઝરને ફોન સેટેલાઇટ તરફ રાખવાની જરૂર નહીં પડે. આનો અર્થ એ થયો કે જો તમારો iPhone તમારા ખિસ્સા, કાર અથવા બેગમાં હોય, તો પણ તે આપમેળે સેટેલાઇટ સાથે કનેક્ટ થઈ જશે.
5G NTN ટેકનોલોજી પણ સામેલ થશે
મળતા અહેવાલો પ્રમાણે Apple તેના આગામી iPhone મોડેલોમાં 5G NTN (નોન-ટેરેસ્ટ્રીયલ નેટવર્ક) સપોર્ટ પણ આપશે. આ ટેકનોલોજી મોબાઇલ ટાવર અને સેટેલાઇટ નેટવર્કને જોડીને વધુ સારું કવરેજ અને સ્થિર કનેક્ટિવિટી આપશે. આનો અર્થ એ છે કે ભવિષ્યના iPhones ફક્ત શહેરોમાં જ નહીં પરંતુ પર્વતો, જંગલો અથવા સમુદ્રમાં પણ કોલ્સ અને મેસેજ સર્વિસ આપશે.
