Maruti Suzuki એ આપ્યો ઝટકો, 1 જૂનથી ગાડીઓ 30 હજાર રૂપિયા સુધી મોંઘી થશે

જો તમે નવી કાર ખરીદવાનું પ્લાનિંગ કરી રહ્યા છો, તો હવે તમારે વધુ પૈસા ખર્ચવા પડશે. દેશની સૌથી મોટી ઓટોમોબાઈલ કંપની મારુતિ સુઝુકીએ પોતાની ગાડીઓની કિંમતો વધારવાની જાહેરાત કરી દીધી છે. કંપની ૧ જૂનથી પોતાની કારોના ભાવ વધારી રહી છે. કંપનીની કારો 30 હજાર રૂપિયા સુધી મોંઘી થશે. કંપનીએ ગાડીઓની કિંમતમાં થઈ રહેલા આ વધારાનું કારણ વધતી મોંઘવારી અને ઉત્પાદન ખર્ચમાં સતત થઈ રહેલો વધારો ગણાવ્યો છે. 

મારુતિએ જણાવ્યું કે, 'છેલ્લા કેટલાક મહિનાઓથી કંપની ઉત્પાદન ખર્ચની અસરને ઓછી કરવા માટે સતત 'કોસ્ટ રિડક્શન' ઉપાયો પર કામ કરી રહી હતી, જેથી ગ્રાહકો પર ઓછામાં ઓછો બોજ પડે.' જોકે, વધતી જતી કિંમતો અને ઇનપુટ ખર્ચના કારણે હવે કંપનીએ ભાવ વધારવાનો નિર્ણય લેવો પડ્યો છે. તેમની કારોની કિંમત 1 જૂન 2026થી ૩૦ હજાર રૂપિયા સુધી વધશે. જોકે, કંપનીએ હજુ સુધી તમામ મોડલ્સની નવી કિંમતો જાહેર કરી નથી.

મહિન્દ્રા અને ટાટા પણ વધારી ચૂકી છે ભાવ

ભારતીય બજારમાં કારોની કિંમતો સતત વધી રહી છે. પહેલા જ્યાં આ કિંમતો વર્ષમાં એક કે બે વાર વધતી હતી, હવે દર મહિને કેટલાક મોડલ્સના ભાવ વધારાનો ટ્રેન્ડ બની ગયો છે. આ પહેલા મહિન્દ્રાએ પોતાની SUVની કિંમતો વધારી હતી. આ વધારો એપ્રિલ 2026માં થયો હતો. મહિન્દ્રાએ પોતાની ગાડીઓની કિંમતમાં 2.5 ટકા સુધીનો વધારો કર્યો છે, જ્યારે બ્રાન્ડના પોર્ટફોલિયોની એવરેજ કોસ્ટ આશરે 1.6 ટકા વધી હતી. મહિન્દ્રાએ પણ પોતાની કારોના ભાવ વધારવા પાછળ ઇનપુટ અને ઓપરેશનલ કોસ્ટને કારણ ગણાવ્યું હતું. આ ઉપરાંત ટાટા મોટર્સે પણ પોતાની ગાડીઓની કિંમતમાં 1 એપ્રિલ 2026થી વધારો કર્યો છે. કંપનીએ પોતાની કારોની કિંમતમાં સરેરાશ 0.5 ટકાનો અંશતઃ વધારો કર્યો હતો. આની પાછળ પણ કંપનીએ ઇનપુટ કોસ્ટ વધવાનું કારણ આપ્યું હતું.

 GST કટની અસર હવે ખતમ

ગયા વર્ષે સપ્ટેમ્બરમાં થયેલા જીએસટી (GST) ઘટાડાને કારણે કારની અસલ કિંમતમાં ગ્રાહકોને જે ફાયદો મળ્યો હતો, તે હવે લગભગ ખતમ થઈ ચૂક્યો છે. તે સમયે સરકારે 4મીટરથી નાની અને 1200 cc સુધીના પેટ્રોલ તેમજ 1.5 લીટર સુધીના ડીઝલ એન્જિનવાળી ગાડીઓને 18 ટકાના જીએસટી દાયરામાં રાખી હતી. આ સિવાય મારુતિ સુઝુકીએ પોતાની નાની ગાડીઓની કિંમતોમાં અલગથી પણ ઘટાડો કર્યો હતો.