એપલે ભારતમાં iPhoneનું ઉત્પાદન બમણું કર્યું, હવે દર 7મો ફોન મેડ ઇન ઈન્ડિયા હશે

છેલ્લા કેટલાક વર્ષોમાં ભારતમાં iPhone ખરીદનારા યુઝર્સની સંખ્યામાં ઝડપથી વધારો થયો છે. ભારતમાં iPhoneનો ક્રેઝ સતત વધી રહ્યો છે અને તેથી હવે Appleએ ભારતમાં iPhoneનું ઉત્પાદન બમણું કરવાનો નિર્ણય લીધો છે. આનો અર્થ એ થયો કે હવે એપલ કંપની ભારતમાં અગાઉ બનેલા આઇફોન કરતાં બમણા આઇફોન બનાવશે.

આઇફોનનું ઉત્પાદન બમણું થશે

બ્લૂમબર્ગના અહેવાલ મુજબ, એપલે ભારતમાં તેના iPhone એસેમ્બલીને પાછલા નાણાકીય વર્ષની સરખામણીમાં બમણું કરીને $14 બિલિયન કરી દીધું છે. રિપોર્ટમાં કહેવામાં આવ્યું છે કે દર સાતમાંથી એક આઈફોન ભારતમાં બને છે, એટલે કે એપલ ભારતમાં તેના લગભગ 14 ટકા આઈફોનનું ઉત્પાદન કરે છે. આવી સ્થિતિમાં, એવું કહી શકાય કે Apple ધીમે ધીમે પરંતુ ચીન પરની તેની નિર્ભરતાને સંપૂર્ણપણે ખતમ કરી રહ્યું છે. જોકે, એ નોંધનીય છે કે ચીન એપલનું સૌથી મોટું આઇફોન ઉત્પાદન કેન્દ્ર છે અને તાજેતરમાં એપલે ચીનમાં તેની બીજી સૌથી મોટી ઉત્પાદન યોજના પણ ખોલી છે. Huawei Technologies Co. જેવા હરીફોની વધતી જતી સ્પર્ધા અને ચીનમાં વિદેશી ટેક્નોલોજી પર ચાલી રહેલા પ્રતિબંધને કારણે Appleની આવકમાં સતત ઘટાડો થઈ રહ્યો છે.

ભારતમાં 1,50,000 નોકરીઓનું સર્જન થયું

બીજી તરફ ભારતની નીતિ સાવ અલગ છે. ભારતે વિદેશી કંપનીઓને ભારતમાં તેમની ટેક્નોલોજી લાવવા, ઉત્પાદન કરવા અને બિઝનેસ કરવાની છૂટ આપી છે, જેનો ફાયદો વિદેશી કંપનીઓને થઈ રહ્યો છે અને ભારતના લોકોને પણ ફાયદો થઈ રહ્યો છે. સરકારી અહેવાલ મુજબ, આના પરિણામે Appleના સપ્લાયર્સ ક્ષેત્રમાં 1,50,000 નોકરીઓનું સર્જન થયું છે, જે ભારતમાં વધતી બેરોજગારી પર પણ થોડો અંકુશ લાવશે.

Foxconn Technology Group અને Pegatron Corp.એ માર્ચ 2024ના રોજ પૂરા થતા નાણાકીય વર્ષમાં ભારતમાં બનેલા લગભગ 67 ટકા અને 17 ટકા iPhones એસેમ્બલ કર્યા હતા. બાકીના આઇફોન કર્ણાટકમાં વિસ્ટ્રોન કોર્પના પ્લાન્ટમાં બનાવવામાં આવ્યા હતા, જે ગયા વર્ષે ટાટા ગ્રૂપએ લીધો હતો. ટાટા દેશમાં સૌથી મોટા iPhone એસેમ્બલી પ્લાન્ટ્સમાંથી એક સ્થાપવાની યોજના ધરાવે છે. $14 બિલિયનનો આંકડો iPhoneની રિટેલ પ્રાઇઝને નહીં પરંતુ ફેક્ટરીમાંથી બહાર નીકળતી વખતે ડિવાઇસના અંદાજિત મૂલ્યને દર્શાવે છે. જોકે, એપલના પ્રતિનિધિઓએ હાલમાં આ અંગે ટિપ્પણી કરવાનો ઇનકાર કર્યો હતો.