Video: સૌરાષ્ટ્રનો બીજા નંબરનો સૌથી મોટો ભાદર - 1 ડેમ ઓવરફલો થવાની તૈયારીમાં, જળસંકટ થશે દૂર

સૌરાષ્ટ્ર માટે એક અત્યંત રાહતદાયક સમાચાર સામે આવ્યા છે. સૌરાષ્ટ્રનો બીજા નંબરનો સૌથી મોટો ગણાતો ભાદર-1 ડેમ તેની પૂર્ણ સપાટીએ ભરાઈ ચૂક્યો છે અને તે ગમે ત્યારે ઓવરફ્લો થવાની તૈયારીમાં છે. 29 દરવાજા અને 34 ફૂટની સપાટી ધરાવતો આ વિશાળ ડેમ 100% ભરાઈ ગયો છે. ડેમના ઉપરવાસના વિસ્તારોમાં થયેલા સારા વરસાદ અને સૌની યોજના (SAUNI Yojana) હેઠળ પાણીની આવક થવાના કારણે ડેમમાં પાણીનો જથ્થો છલકાઈ ગયો છે.

ભાદર-1 ડેમ સંપૂર્ણ ભરાઈ જવાથી રાજકોટ સહિત સૌરાષ્ટ્રના વિશાળ વિસ્તારમાં છેલ્લા કેટલાક સમયથી ઊભું થયેલું પીવાના અને સિંચાઈના પાણીનું સંકટ દૂર થઈ ગયું છે. આ ડેમ રાજકોટ, જેતપુર, વીરપુર, ખોડલધામ, અમરનગર જૂથ યોજના સહિત આશરે 22 લાખ લોકોને પીવાનું પાણી પૂરું પાડે છે. તેથી જ આ ખૂબ ખૂબ જ  મહત્ત્વપૂર્ણ ગણાય છે.

ડેમ 100% ભરાઈ જતાં, હવે તંત્ર દ્વારા ગેટ ઓપરેશન કરીને તેને ઓવરફ્લો કરવામાં આવશે. આ સંભવિત ઓવરફ્લોને ધ્યાનમાં રાખીને, ભાદર-1 ડેમ નજીકના વિસ્તારોના લોકોને તંત્ર દ્વારા કડક સૂચના આપવામાં આવી છે કે તેઓ નદીના પટમાં અવર-જવર ન કરે, જેથી કોઈ અનિચ્છનીય ઘટના ન બને. આ જળરાશિ આગામી વર્ષ માટે ખેડૂતો અને સામાન્ય જનતા માટે જીવાદોરી સમાન સાબિત થશે.