VIDEO: ચોરવીરા ગામે કાર્બોસેલ ખનન પર મોટા પાયે દરોડો, 9 કુવા જપ્ત, 200 ટનથી વધુ કોલસો ઝડપાયો

surendranagar જીલ્લાના સાયલા નજીક ચોરવીરા ગામે ગેરકાયદેસર કાર્બોસેલ ખનનની ગતિવિધિઓ પર મામલતદારે મોટા પાયે દરોડો પાડ્યો હતો. આ કાર્યવાહી દરમિયાન કુલ 39 કુવા ઝડપાયા હતા, જેમાંથી 200 ટનથી વધુ કોલસો જપ્ત કરવામાં આવ્યો હતો. આ ઉપરાંત, સ્થળ પરથી 50 જેટલી ચરખીઓ અને ચાર ઇલેક્ટ્રિક ટ્રાન્સફોર્મર પણ કબજે કરવામાં આવ્યા હતા.

આ ગેરકાયદેસર ખનન ચોરવીરા સીમ વિસ્તારમાં બે સરકારી સર્વે નંબર 821 અને 823 તેમજ ત્રણ ખાનગી સર્વે નંબર 820, 822 અને 824 એમ કુલ પાંચ સર્વે નંબરમાં લગભગ 50 એકર જમીનમાં ચાલી રહ્યું હતું. આ દરોડા દરમિયાન નવ જેટલા મજૂરોને કુવામાંથી બહાર કાઢી પોલીસને હવાલે કરવામાં આવ્યા હતા.

મામલતદારની આ આકસ્મિક કાર્યવાહીથી ગેરકાયદેસર ખનન સાથે સંકળાયેલા વહીવટદારોમાં ફફડાટ ફેલાયો હતો. આ ઘટનાએ સ્થાનિક વિસ્તારમાં ગેરકાયદેસર ખનનની પ્રવૃત્તિઓ પર નિયંત્રણ લાવવાની જરૂરિયાતને ઉજાગર કરી છે. આગળની તપાસ અને કાર્યવાહી માટે પોલીસે આ મામલે વધુ તપાસ હાથ ધરી છે.