VIDEO: ગુજકેટની પ્રોવિઝનલ આન્સર-કી જાહેર, 8 એપ્રિલ સુધી કરી શકાશે વાંધો કે રજૂઆત

ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ગત 29 માર્ચના રોજ યોજાયેલી ગુજકેટની પ્રોવિઝનલ આન્સર-કી સત્તાવાર રીતે જાહેર કરી દેવામાં આવી છે. જે ઉમેદવારો આ પરીક્ષામાં ઉપસ્થિત રહ્યા હતા, તેઓ બોર્ડની સત્તાવાર વેબસાઇટ પર જઈને ઉત્તરોની ચકાસણી કરી શકે છે.

ગણિત, ભૌતિક વિજ્ઞાન, રસાયણ વિજ્ઞાન અને જીવ વિજ્ઞાનના પ્રશ્નપત્ર સેટ નંબર 1 થી 20ની આન્સર-કી ગુજરાતી, હિન્દી અને અંગ્રેજી એમ ત્રણેય માધ્યમો માટે પ્રસિદ્ધ કરવામાં આવી છે. વિદ્યાર્થીઓ વેબસાઇટ www.gseb.org પરથી આ વિગતો મેળવી શકશે. જો કોઈ ઉમેદવારને પ્રસિદ્ધ થયેલી આન્સર-કી સામે વાંધો કે રજૂઆત હોય, તો તેઓ 8 એપ્રિલ, 2026ના રોજ સાંજે 18:00 કલાક સુધીમાં પોતાની રજૂઆત મોકલી શકે છે.

આ માટે ઉમેદવારે નિયત નમૂનામાં વિષયવાર અને પ્રશ્નદીઠ અલગ ફોર્મ ભરીને જરૂરી આધારો સાથે ઈ-મેઈલ કરવાનો રહેશે. મહત્ત્વની બાબત એ છે કે દરેક પ્રશ્ન દીઠ રૂ.500/- ની ફી નિર્ધારિત કરવામાં આવી છે.