VIDEO: બાળકીએ જીવના જોખમે 2 ભૂલકાંઓને બચાવ્યા, લિફ્ટના સીસીટીવી ફુટેજ થયા વાયરલ

તાજેતરમાં સોશિયલ મીડિયા પર એક ચોંકાવનારો વીડિયો વાયરલ થયો છે, જેમાં એક નાની બાળકીએ પોતાની બહાદુરી અને ત્વરિત નિર્ણયશક્તિથી બે નાનાં બાળકોના જીવ બચાવ્યા છે. આ સમગ્ર ઘટના સીસીટીવી (CCTV) ફૂટેજમાં કેદ થઈ ગઈ છે.

શું હતી સમગ્ર ઘટના?

વાયરલ વીડિયોમાં જોઈ શકાય છે કે એક નાની બાળકી લિફ્ટના દરવાજા પાસે ઉભી હતી, જ્યારે તેની સાથેના બે નાના બાળકો પહેલેથી જ લિફ્ટની અંદર પહોંચી ગયા હતા. આ આખું ગ્રુપ કદાચ તેમના માતા-પિતા લિફ્ટમાં આવે તેની રાહ જોઈ રહ્યું હતું.

અચાનક લિફ્ટના દરવાજા બંધ થવા લાગ્યા હતા. પરિસ્થિતિની ગંભીરતા સમજીને બાળકીએ જરા પણ વિલંબ કર્યા વગર પોતાનો પગ બંધ થતા દરવાજાની વચ્ચે મૂકી દીધો હતો, જેથી બાળકો અંદર એકલા ફસાઈ ન જાય.

લિફ્ટમાં સર્જાઈ ખામી

સામાન્ય રીતે સેન્સરવાળી લિફ્ટમાં કોઈ વસ્તુ વચ્ચે આવે તો દરવાજા આપોઆપ ખુલી જતા હોય છે, પરંતુ આ કિસ્સામાં લિફ્ટમાં ખામી હોવાનું જણાયું હતું. બાળકીનો પગ વચ્ચે હોવા છતાં દરવાજા ખુલવાને બદલે તેને દબાવતા રહ્યા હતા. જોકે, બાળકીએ હિંમત ન હારી અને તે ત્યાં જ ઉભી રહી, જેને કારણે દરવાજા પૂરેપૂરા બંધ થઈ શક્યા નહીં.

બાળકીની આ મથામણ જોઈને તુરંત જ ત્યાં હાજર રહેલા અન્ય પુખ્ત વયના લોકો દોડી આવ્યા હતા. તેમણે બાળકીની મદદ કરી અને લિફ્ટના દરવાજાને પરાણે રોકી રાખ્યા હતા. ભારે જહેમત બાદ અંતે તે નાના બાળકોને સલામત રીતે બહાર કાઢવામાં આવ્યા હતા.