VIDEO: LPG ગ્રાહકો માટે રાહતના સમાચાર: ગેસ સિલિન્ડર માટે e-KYC કરાવવાની સમયમર્યાદામાં વધારો

રસોઈ ગેસ સિલિન્ડર ગ્રાહકો માટે રાહતના સમાચાર છે. ઓઇલ માર્કેટિંગ કંપનીઓએ એલપીજી ગેસ કનેક્શનની ઈ-કેવાયસી(e-KYC) પ્રક્રિયા પૂર્ણ કરવાની છેલ્લી તારીખ લંબાવી દીધી છે. અગાઉ e-KYC કરાવવાની છેલ્લી તારીખ 16 ઑગસ્ટ 2026 હતી, જેને હવે વધારીને 23 ઑગસ્ટ 2026 કરવામાં આવી છે. જે ગ્રાહકોએ અગાઉ જ e-KYC પ્રક્રિયા પૂર્ણ કરી લીધી છે, તેમણે ફરીથી આ પ્રક્રિયા કરવાની જરૂર નથી. જો તમે તમારા કનેક્શન સ્ટેટસ અંગે અસમંજસમાં હોવ, તો સંબંધિત ગેસ કંપનીની ઓફિશિયલ મોબાઇલ એપ અથવા નજીકની ગેસ એજન્સીનો સંપર્ક કરીને e-KYC સ્ટેટસ તપાસી શકો છો. જે ગ્રાહકોની કેવાયસી બાકી છે, તેમણે 23 ઑગસ્ટ 2026 સુધીમાં તેને પૂર્ણ કરી લેવી.

ઘરેલુ ગ્રાહકો માટે કેવાયસી મહત્ત્વપૂર્ણ

ઘરેલુ ગેસ ગ્રાહકો માટે કેવાયસી કરાવવું અતિ મહત્ત્વપૂર્ણ છે, જેથી ગેસ સિલિન્ડર યોગ્ય અને પાત્ર વ્યક્તિ સુધી જ પહોંચે તે સુનિશ્ચિત થઈ શકે. ઘણી અપીલો છતાં હજુ પણ મોટી સંખ્યામાં ગ્રાહકોનું e-KYC બાકી છે. માત્ર મધ્યપ્રદેશમાં જ 39 લાખથી વધુ ગ્રાહકોની e-KYC પ્રક્રિયા પૂર્ણ થઈ નથી, જેથી કંપનીઓ સોશિયલ મીડિયા અને SMS દ્વારા સતત અપીલ કરી રહી છે.

કેવી રીતે કરાવવું LPG e-KYC?
 
ગ્રાહકો સરળતાથી 3 રીતે પોતાની e-KYC પ્રક્રિયા પૂર્ણ કરી શકે છે.

મોબાઇલ એપ દ્વારા

ઇન્ડિયન ઓઇલ(IndianOil)ના ગ્રાહકો IndianOil ONE એપ દ્વારા.

હિન્દુસ્તાન પેટ્રોલિયમ(HPCL)ના ગ્રાહકો HP PAY એપ દ્વારા.

ગ્રાહકો ઘરેબેઠા બાયોમેટ્રિક અથવા ફેસ ઓથેન્ટિકેશન(Face Authentication)થી ઈ-કેવાયસી પૂરું કરી શકે છે.

ગેસ એજન્સી પર જઈને પણ કરી શકાય છે e-KYC

તમારું ઓળખપત્ર અને ગેસ કનેક્શનની પાસબુક લઈને નજીકની ગેસ એજન્સી પર જઈ બાયોમેટ્રિક (ફિંગરપ્રિન્ટ) મદદથી ઈ-કેવાયસી પૂર્ણ કરો.

ડિલિવરી બોયની મદદથી

જ્યારે ગેસ સિલિન્ડર ઘરે આવે ત્યારે ડિલિવરી મેન પાસે રહેલા મશીન દ્વારા બાયોમેટ્રિક વેરિફિકેશન કરાવીને પણ ઈ-કેવાયસી કરાવી શકાય છે.