પોલીસ સ્ટેશનમાં ઉંદરો 200 કિલો ગાંજો ખાઈ ગયા! આરોપી નિર્દોષ જાહેર

ઝારખંડના રાંચી સ્થિત ઓરમાનઝી પોલીસ સ્ટેશનમાં જપ્ત કરાયેલો ૨૦૦ કિલો ગાંજો કથિત રીતે ઉંદરો ખાઈ જવાથી NDPS કેસ નબળો પડ્યો હતો. પુરાવા રજૂ ન કરી શકવા અને તપાસમાં બેદરકારીને કારણે અદાલતે આરોપી ઈન્દ્રજીત રાયને નિર્દોષ જાહેર કર્યો છે. આ મામલે પોલીસની કાર્યશૈલી પર અનેક સવાલો ઊભા થયા છે.

પ્રાકૃતિક ખનિજોથી સમૃદ્ધ ઝારખંડ ફરી એકવાર વિચિત્ર કારણસર દેશભરમાં ચર્ચાનો વિષય બન્યું છે. આ વખતે મામલો પહાડો કે ખનિજોનો નથી, પરંતુ પોલીસની દેખરેખ હેઠળ રાખવામાં આવેલા આશરે ૨૦૦ કિલો ગાંજાનો છે, જેને કથિત રીતે ઉંદરો ખાઈ ગયા. નવાઈની વાત એ છે કે, આ કારણોસર NDPS એક્ટના એક ગંભીર કેસમાં આરોપીને કોર્ટે નિર્દોષ છોડી મૂક્યો છે.

શું હતો આખો મામલો?

જાણકારી મુજબ, ૨૦૦ કિલોગ્રામ ગાંજાની બજારમાં કિંમત અંદાજે ૧ કરોડ રૂપિયા આંકવામાં આવી હતી. આ ગાંજો ઝારખંડની રાજધાની રાંચીના ઓરમાનઝી પોલીસ સ્ટેશન વિસ્તારમાં વર્ષ ૨૦૨૨માં જપ્ત કરવામાં આવ્યો હતો. આ કેસ બિહારના વૈશાલી જિલ્લાના રહેવાસી ઈન્દ્રજીત રાય ઉર્ફે અનુરજીત રાય સાથે જોડાયેલો છે, જેની પોલીસે ગાંજાની તસ્કરીના આરોપમાં ધરપકડ કરી હતી.

જાન્યુઆરી ૨૦૨૨માં પોલીસને ગુપ્ત માહિતી મળી હતી કે એક સફેદ રંગની ગાડીમાં માદક પદાર્થ લઈ જવામાં આવી રહ્યો છે. માહિતીના આધારે પોલીસે વાહન ચેકિંગ અભિયાન શરૂ કર્યું. આ દરમિયાન રાંચીથી રામગઢ તરફ જતી એક બોલેરોને રોકવામાં આવી. પોલીસને જોતા જ વાહનમાં સવાર અન્ય લોકો ફરાર થઈ ગયા, જ્યારે પોલીસે એક વ્યક્તિને પકડી પાડ્યો હતો.

૨૦૦ કિલો ગાંજો કબજે કરવામાં આવ્યો હતો

પોલીસે જ્યારે બોલેરોની તલાશી લીધી ત્યારે તેમાંથી ૨૦૦ કિલો ગાંજો મળી આવ્યો હતો. ત્યારબાદ NDPS એક્ટની ગંભીર કલમો હેઠળ ગુનો નોંધી આરોપીને જેલ મોકલી દેવામાં આવ્યો. તપાસ બાદ પોલીસે ચાર્જશીટ દાખલ કરી અને આરોપી પર આરોપ પણ નક્કી કરવામાં આવ્યા.

જોકે, જ્યારે કેસ કોર્ટમાં સાક્ષી અને પુરાવા માટે પહોંચ્યો ત્યારે પોલીસની કામગીરી પર ગંભીર સવાલો ઊભા થયા. સુનાવણી દરમિયાન પોલીસ ન તો જપ્ત કરેલો ગાંજો રજૂ કરી શકી અને ન તો કોઈ નક્કર પુરાવા આપી શકી. સાક્ષીઓના નિવેદનો અને પોલીસ રેકોર્ડમાં પણ વિરોધાભાસ જોવા મળ્યો હતો.

૨૦૦ કિલો ગાંજો ઉંદર ખાઈ ગયા!

સૌથી ચોંકાવનારો ખુલાસો ત્યારે થયો જ્યારે કોર્ટને જણાવવામાં આવ્યું કે પોલીસ સ્ટેશનના માલખાનામાં રાખવામાં આવેલો ૨૦૦ કિલો ગાંજો ઉંદરો ખાઈ ગયા છે. પોલીસે આ અંગે વર્ષ ૨૦૨૪માં એક ફરિયાદ નોંધવામાં આવી હોવાનું પણ જણાવ્યું, પરંતુ કોર્ટે તેને પુરાવાની સુરક્ષામાં ગંભીર બેદરકારી ગણાવી.

અદાલતે સ્પષ્ટપણે જણાવ્યું કે, જપ્ત કરાયેલા નશીલા પદાર્થોની સુરક્ષા પોલીસની જવાબદારી છે. પુરાવા નષ્ટ થવાથી તપાસની વિશ્વસનીયતા પર પ્રશ્નાર્થ ચિન્હ લાગે છે. આ જ આધાર પર કોર્ટે આરોપી ઈન્દ્રજીત રાયને નિર્દોષ જાહેર કર્યો.

પોલીસ સુરક્ષામાં આવું કેવી રીતે શક્ય છે?

આ ચુકાદા પછી અનેક સવાલો ઉઠી રહ્યા છે:

પોલીસની દેખરેખમાં રાખેલો આટલો મોટો જથ્થો ઉંદર કેવી રીતે ખાઈ શકે?
શું માલખાનામાં જપ્ત કરાયેલા પદાર્થોની સુરક્ષા માટે કોઈ યોગ્ય વ્યવસ્થા નથી?
અથવા શું આ દાવા પાછળ કોઈ અન્ય સત્ય છુપાયેલું છે?

આ ઘટનાએ ઝારખંડ પોલીસની કાર્યપદ્ધતિ અને સિસ્ટમની બેદરકારીને છતી કરી છે, જેનાથી કાયદો અને વ્યવસ્થાની વિશ્વસનીયતા પર ઊંડી અસર પડી છે.