ભારે વરસાદે વધારી મુશ્કેલી, શ્રીનંદ નગરમાં પાણી ભરાતા ધારાસભ્ય અમિત ઠાકર દોડી આવ્યા

અમદાવાદમાં વરસાદે ફરી એકવાર તોફાની બેટિંગ કરતાં અનેક વિસ્તારો જળબંબાકાર બની ગયા છે. શહેરના સરખેજ વિસ્તારમાં આવેલા શ્રીનંદ નગરમાં માત્ર બે કલાકના ભારે વરસાદ બાદ કમર સુધી પાણી ભરાઈ જતાં સ્થાનિક રહેવાસીઓ ભારે મુશ્કેલીમાં મુકાયા હતા. રહેણાંક વિસ્તારો, સોસાયટીઓ અને આંતરિક રસ્તાઓ પર પાણી ભરાઈ જતાં લોકો ઘરોમાં જ ફસાઈ ગયા હતા.

સ્થાનિકોના જણાવ્યા મુજબ ભારે વરસાદના કારણે વરસાદી પાણીના નિકાલની વ્યવસ્થા ખોરવાઈ જતાં સમગ્ર વિસ્તાર પાણીમાં ગરકાવ થઈ ગયો હતો. અનેક વાહનો પાણીમાં ફસાઈ ગયા હતા અને લોકોને અવરજવર કરવામાં મુશ્કેલીનો સામનો કરવો પડ્યો હતો.

પરિસ્થિતિની જાણ થતાં વિસ્તારના ધારાસભ્ય અમિત ઠાકર સ્થાનિક આગેવાનો અને કાર્યકરો સાથે શ્રીનંદ નગર પહોંચ્યા હતા. તેમણે સ્થળ પર જઈને સ્થિતિનો તાગ મેળવ્યો હતો તેમજ સ્થાનિક લોકોની સમસ્યાઓ સાંભળી હતી. આ દરમિયાન તેમણે સંબંધિત અધિકારીઓ સાથે તાત્કાલિક વાતચીત કરી પાણીના નિકાલ અને રાહત કામગીરી ઝડપી બનાવવા સૂચના આપી હતી.

શ્રીનંદ નગર વિસ્તારમાં આવેલી એક શાળામાં બાળકો ફસાયેલા હોવાની માહિતી મળતાં ધારાસભ્ય અમિત ઠાકરે અધિકારીઓ સાથે ચર્ચા કરી બાળકોને સલામત રીતે બહાર કાઢવા અને સુરક્ષિત સ્થળે ખસેડવા માટે જરૂરી કાર્યવાહી હાથ ધરવા જણાવ્યું હતું. તંત્ર દ્વારા રેસ્ક્યુ કામગીરી માટે ટીમોને સક્રિય કરવામાં આવી હતી.

અમદાવાદમાં સતત વરસી રહેલા વરસાદને કારણે શહેરના અનેક નીચાણવાળા વિસ્તારોમાં પાણી ભરાવાની સમસ્યા સર્જાઈ છે. શ્રીનંદ નગરની ઘટના બાદ સ્થાનિકોમાં તંત્રની વરસાદી પૂર્વ તૈયારીઓ અને ડ્રેનેજ વ્યવસ્થાને લઈને પણ સવાલો ઉઠી રહ્યા છે. હાલ તંત્ર દ્વારા પાણી ઉતારવા અને અસરગ્રસ્ત લોકોને જરૂરી મદદ પહોંચાડવા માટે કામગીરી ચાલુ રાખવામાં આવી છે.