VIDEO: ડેભોલ નદીમાં ઘોડાપૂર વચ્ચે કાર તણાઈ, ઇડર-વલાસણા હાઇવે પાણીમાં ગરકાવ!

સાબરકાંઠા જિલ્લાના ઇડર અને આસપાસના વિસ્તારોમાં મેઘરાજાએ રૌદ્ર સ્વરૂપ ધારણ કર્યું છે. ઇડરમાં પડેલા મુશળધાર વરસાદને કારણે સ્થાનિક ડેભોલ નદીમાં ભયાનક ઘોડાપૂર આવ્યું છે. નદીના ધસમસતા પ્રવાહ વચ્ચે એક ચાલતી કાર તણાઈ ગઈ હોવાની અત્યંત ચોંકાવનારી ઘટના સામે આવી છે, જેનાથી સમગ્ર પંથકમાં ભારે અફરાતફરી અને ચિંતાનો માહોલ વ્યાપી ગયો છે.

ઇડર-વલાસણા હાઇવે પર ઢીંચણસમા પાણી, વાહનવ્યવહાર ઠપ્પ

સતત અને અનરાધાર વરસી રહેલા વરસાદને કારણે ઇડર શહેરના નીચાણવાળા મોટા ભાગના વિસ્તારો જળમગ્ન બની ગયા છે. ઇડર-વલાસણા હાઇવે રોડ પર ઢીંચણસમા વરસાદી પાણી ભરાઈ જતાં વાહનચાલકો અને રાહદારીઓને પસાર થવામાં ભારે મુશ્કેલીઓનો સામનો કરવો પડી રહ્યો છે. મુશળધાર વરસાદની અસર સરકારી મિલકતો પર પણ જોવા મળી છે, જ્યાં માર્ગ અને મકાન વિભાગ (R&B) ની કચેરીના કમ્પાઉન્ડમાં પાણી ભરાઈ જતાં રોજિંદી કામગીરી પ્રભાવિત થઈ છે.