VIDEO: ક્રિકેટ ઓસ્ટ્રેલિયા અને ખેલાડીઓ વચ્ચે ઉભો થયો વિવાદ, નવો કોન્ટ્રકટ સાઈન કરવાનો ઇનકાર કરી રહ્યા છે સિનિયર પ્લેયર્સ

ઓસ્ટ્રેલિયન ક્રિકેટમાં હાલમાં અંદરુની તણાવ ચરમસીમાએ છે. ક્રિકેટ ઓસ્ટ્રેલિયા (CA) અને તેના દિગ્ગજ ખેલાડીઓ વચ્ચે સેન્ટ્રલ કોન્ટ્રાક્ટને લઈને મોટો વિવાદ ઊભો થયો છે. બિગ બેશ લીગ (BBL) ના આયોજન અને શેડ્યૂલની સમસ્યાઓ વચ્ચે હવે ખેલાડીઓના અસંતોષે બોર્ડની ચિંતામાં વધારો કર્યો છે.

ખેલાડીઓએ કોન્ટ્રાક્ટ પર સાઈન ન કરી

તાજેતરના અહેવાલો મુજબ, ઓસ્ટ્રેલિયાના 5 જેટલા સીનિયર ખેલાડીઓએ નવા નેશનલ કોન્ટ્રાક્ટ પર હસ્તાક્ષર કરવાનો ઇનકાર કરી દીધો છે. ખેલાડીઓ કોન્ટ્રાક્ટમાં મળતી રકમથી ખુશ નથી. તેમની મુખ્ય માંગ એ છે કે તેમને વિદેશી T20 લીગ (જેમ કે IPL, SA20, ILT20) માં રમવા માટે વધુ આઝાદી અને સરળતાથી NOC (અનાપત્તિ પ્રમાણપત્ર) આપવામાં આવે.

પેટ કમિન્સ પર કરોડોનો વરસાદ, અન્યમાં નારાજગી

રિપોર્ટમાં દાવો કરવામાં આવ્યો છે કે કેપ્ટન પેટ કમિન્સને 3 વર્ષ માટે અંદાજે 12 મિલિયન ડોલરનો વિશાળ કોન્ટ્રાક્ટ ઓફર કરવામાં આવ્યો છે. કમિન્સને આટલી મોટી રકમની ઓફર મળતા અન્ય ખેલાડીઓમાં નારાજગી વધી છે. તેમનું માનવું છે કે ફ્રેન્ચાઈઝી ક્રિકેટની સરખામણીએ તેમના નેશનલ કોન્ટ્રાક્ટનો પગાર હવે ઘણો ઓછો છે.

પગારમાં ભેદભાવનો આક્ષેપ

ગયા વર્ષે ઓક્ટોબરમાં BBLના 12 મુખ્ય ખેલાડીઓએ એક વોટ્સએપ ગ્રુપ બનાવીને પગારની અસમાનતા પર ચર્ચા કરી હતી. ખેલાડીઓની ફરિયાદ છે કે વિદેશી ખેલાડીઓને ઘણીવાર સ્થાનિક ઓસ્ટ્રેલિયન ખેલાડીઓ કરતા વધુ પૈસા આપવામાં આવે છે, જે અન્યાયી છે.

ક્રિકેટ ઓસ્ટ્રેલિયા સામે મોટો પડકાર

IPL અને અન્ય ગ્લોબલ લીગ જે રીતે ખેલાડીઓને મોટી રકમ ઓફર કરી રહી છે, તેને જોતા ઓસ્ટ્રેલિયન ખેલાડીઓ હવે પોતાની કારકિર્દી અને કમાણી માટે નવી રણનીતિ બનાવી રહ્યા છે. જો બોર્ડ ખેલાડીઓને સંતોષવામાં નિષ્ફળ જશે, તો આગામી સમયમાં ઓસ્ટ્રેલિયાના સ્ટાર ખેલાડીઓ ઈન્ટરનેશનલ ક્રિકેટને બદલે ફ્રેન્ચાઈઝી ક્રિકેટને વધુ પ્રાધાન્ય આપી શકે છે.