Video: 'અબ હટાવો ભાજપ સરકાર', મોંઘવારી મુદ્દે અમિત ચાવડાએ આપ્યો આંદોલનનો સંકેત

સોર્સ: Dhaval barot

ગુજરાતમાં વધતી મોંઘવારી અને ફુગાવાના મુદ્દે કોંગ્રેસે ભાજપ સરકાર સામે મોરચો ખોલ્યો છે. અમદાવાદમાં કોંગ્રેસ પ્રદેશ પ્રમુખ અમિત ચાવડાએ પ્રેસ કોન્ફરન્સ યોજી કેન્દ્ર અને રાજ્ય સરકાર પર આકરા પ્રહારો કર્યા હતા. તેમણે આક્ષેપ કર્યો કે ભાજપે 2014માં મોંઘવારી ઘટાડવાના વાયદા સાથે સત્તા મેળવી હતી, પરંતુ 12 વર્ષ બાદ પણ મોંઘવારી ઘટવાને બદલે સતત વધી રહી છે.

અમિત ચાવડાએ જણાવ્યું હતું કે, એક તરફ સરકાર ઉત્સવો અને રાજકીય કાર્યક્રમોમાં વ્યસ્ત છે, તો બીજી તરફ સામાન્ય જનતાના ખિસ્સા ખાલી થઈ રહ્યા છે. ગેસ સિલિન્ડર, ખાદ્યતેલ, દૂધ, છાશ, પેટ્રોલ, ડીઝલ અને CNG સહિતની જીવનજરૂરી વસ્તુઓના ભાવમાં વધારો થતાં સામાન્ય પરિવારનું બજેટ ખોરવાયું છે.

જાહેરાત

તેમણે વધુમાં આક્ષેપ કર્યો કે દિવાળીના તહેવારો પૂર્ણ થતાં જ ખાદ્યતેલના ભાવમાં વધારો થયો છે. UPA સરકારના સમયમાં ગેસ અને તેલના ભાવને લઈને ભાજપ વિરોધ પ્રદર્શનો કરતું હતું, પરંતુ આજે મોંઘવારી સામે સરકાર મૌન છે. તેલના ભાવમાં વધારો એટલો છે કે હવે તેલમાં નહીં પરંતુ પાણીમાં પૂરી તળવાની સ્થિતિ સર્જાઈ છે.

કોંગ્રેસ પ્રમુખે ફુગાવાના આંકડા રજૂ કરીને સરકારની નીતિઓ પર સવાલ ઉઠાવ્યા હતા. તેમના જણાવ્યા અનુસાર, છેલ્લા કેટલાક મહિનામાં મોંઘવારીના દરમાં નોંધપાત્ર વધારો થયો છે. અદાણી બાદ ગુજરાત એનર્જી દ્વારા પણ CNGના ભાવમાં વધારો કરવામાં આવ્યો હોવાનો તેમણે ઉલ્લેખ કર્યો હતો.

અમિત ચાવડાએ વડાપ્રધાન નરેન્દ્ર મોદી પર પ્રહાર કરતાં કહ્યું હતું કે, ઉદ્યોગપતિઓને માલામાલ કરવામાં આવી રહ્યા છે, જ્યારે સામાન્ય માણસ મોંઘવારીના મારથી પીસાઈ રહ્યો છે. તેમણે કટાક્ષ કરતાં કહ્યું કે આજે લોકો નરેન્દ્ર મોદીને 'મોંઘવારી મેન' તરીકે ઓળખે છે.

**કોંગ્રેસ કરશે રસ્તા પર ઉતરીને વિરોધ**

મોંઘવારીના મુદ્દે કોંગ્રેસ હવે આક્રમક લડાઈ લડવાની તૈયારીમાં છે. અમિત ચાવડાએ સ્પષ્ટ કર્યું કે સામાન્ય જનતાને મોંઘવારીમાંથી રાહત અપાવવા કોંગ્રેસ આંદોલન કરશે. સામાન્ય લોકોને સાથે રાખીને રસ્તા પર ઉતરી સરકારનો વિરોધ કરવામાં આવશે અને મોંઘવારીના મુદ્દે સરકારને ઘેરવામાં આવશે.

તેમણે જનતાને પણ આહ્વાન કરતાં કહ્યું કે ભાજપે આપેલા સૂત્રોનો સમય હવે પૂરો થયો છે અને આજે જનતાનો નારો હોવો જોઈએ – 'અબ હટાવો ભાજપ સરકાર'.

કોંગ્રેસે સ્પષ્ટ સંકેત આપ્યો છે કે મોંઘવારીના મુદ્દે આગામી દિવસોમાં રાજ્યભરમાં જનઆંદોલન કરી સરકાર સામે વિરોધ વધુ તેજ કરવામાં આવશે.

આ સમાચાર શેર કરો

જાહેરાત