સુનિતા વિલિયમ્સ આજે રાત્રે નવા અવકાશયાનમાં ભરશે ઉડાન, ગયા મહિને મિશન રખાયું હતું મોકૂફ

ભારતીય મૂળની અવકાશયાત્રી સુનીતા વિલિયમ્સ ફરી એકવાર અવકાશમાં ઉડાન ભરવા જઈ રહી છે. તે બોઇંગના સ્ટારલાઇનર અવકાશયાનમાં બેસીને અવકાશમાં જશે, જે આજે રાત્રે 10 વાગ્યે ફ્લોરિડામાં કેનેડી સ્પેસ સેન્ટરથી ઉંડાણ ભરશે. અગાઉ 7 મેના રોજ અવકાશયાનના ઓક્સિજન વાલ્વમાં ટેકનિકલ ખામીના કારણે તેમની ઉડાન રોકી દેવામાં આવી હતી.

અમેરિકાની સ્પેસ એજન્સી NASA એ  કહ્યું, "જો બધુ બરાબર રહેશે, તો સ્ટારલાઈનર ઈન્ટરનેશનલ સ્પેસ સ્ટેશન પર ડોક કરશે, ત્યારબાદ સુનિતા વિલિયમ્સ અને બૂચ વિલ્મોર તેમના સાથીદારો સાથે સ્ટારલાઈનર સ્પેસક્રાફ્ટ અને તેની સબ-સિસ્ટમનું પરીક્ષણ કરવા માટે લગભગ એક સપ્તાહ સુધી સ્ટેશન પર પસાર કરશે. 

સુનિતા વિલિયમ્સના નામે એક ખાસ રેકોર્ડ છે

સુનિતા વિલિયમ્સે અવકાશમાં 322 દિવસ વિતાવ્યા છે અને સૌથી વધુ કલાકો સુધી સ્પેસવોક કરનાર મહિલા વૈજ્ઞાનિક હોવાનો રેકોર્ડ ધરાવે છે. વિલિયમ્સ પહેલીવાર 9 ડિસેમ્બર, 2006ના રોજ અવકાશમાં ગયા હતા અને 22 જૂન, 2007 સુધી અવકાશમાં રહ્યા હતા. સુનીતા વિલિયમ્સે રેકોર્ડ 29 કલાક અને 17 મિનિટ સુધી ચાર વખત સ્પેસવોક કર્યું હતું. આ પછી, સુનિતા વિલિયમ્સ 14 જુલાઈ 2012ના રોજ બીજી વખત અવકાશ યાત્રા પર ગઈ અને 18 નવેમ્બર 2012 સુધી અવકાશમાં રહી. 59 વર્ષીય સુનીતા વિલિયમ્સે કહ્યું કે તે ઉડાન પહેલા થોડી નર્વસ હતી, પરંતુ સાથે જ તે નવા અવકાશયાનમાં ઉડાન ભરવાને લઈને પણ ઉત્સાહિત હતી. વિલિયમ્સે કહ્યું કે ઇન્ટરનેશનલ સ્પેસ સ્ટેશન તેમના માટે બીજા ઘર જેવું છે.

ત્રીજી વખત અવકાશયાનમાં ઉડાન ભરશે

સુનીતા વિલિયમ્સ ત્રીજી વખત અંતરિક્ષમાં ઉડાન ભરવા જઈ રહી છે. આ સાથે, તેણીને નવા સ્પેસ શટલના પ્રથમ ક્રૂ મિશન પર ઉડાન ભરનાર પ્રથમ મહિલા તરીકે ઇતિહાસ રચવાની તક છે. સુનીતાએ કહ્યું કે તે થોડી નર્વસ છે, પરંતુ નવા અવકાશયાનમાં ઉડાન ભરવાને લઈને ઉત્સાહિત છે. તેણીએ ઉમેર્યું, "જ્યારે હું ઇન્ટરનેશનલ સ્પેસ સ્ટેશન પર પહોંચીશ, ત્યારે તે ઘરે પાછા જવા જેવું હશે." 59 વર્ષીય સુનીતાએ ઇજનેરોને સ્ટારલાઇટ ડિઝાઇન કરવામાં મદદ કરી. આ 10 દિવસના મિશનમાં સ્ટારલાઈનરને તેની અવકાશ ક્ષમતા સાબિત કરવાની તક મળશે. તેના આધારે તેને નાસાનું પ્રમાણપત્ર આપવામાં આવશે.