‘ઇઝરાયલી રાજદૂત ક્યારથી અમેરિકી સેનાના કમાન્ડર-ઇન-ચીફ બન્યા?’ ઈરાનના વિદેશ મંત્રી અરાઘચીનો કટાક્ષ

ઈરાન અને ઇઝરાયલ વચ્ચેના તણાવ વચ્ચે ઈરાનના વિદેશ મંત્રી અબ્બાસ અરાઘચીએ અમેરિકામાં ઇઝરાયલના રાજદૂત યેચિએલ લીટર પર આકરો કટાક્ષ કર્યો છે. લીટરે ઈરાનની હાર બાદ અમેરિકી સૈનિકો પોતાના પરિવાર પાસે પરત ફરી શકશે તેવું નિવેદન આપ્યું હતું. તેના જવાબમાં અરાઘચીએ સવાલ કર્યો કે વોશિંગ્ટનમાં ઇઝરાયલના રાજદૂત ક્યારથી અમેરિકી સેનાના કમાન્ડર-ઇન-ચીફ બની ગયા? અરાઘચીએ સોશિયલ મીડિયા પ્લેટફોર્મ X પર પોસ્ટ કરીને અમેરિકી સૈન્યની તૈનાતી અને સૈનિકોની વાપસી અંગે નિવેદન આપવાના લીટરના અધિકાર પર સવાલ ઉઠાવ્યો હતો. તેમણે કટાક્ષ કરતાં લખ્યું કે, “અમને તો ખબર જ નહોતી કે વોશિંગ્ટનમાં ઇઝરાયલના રાજદૂત અમેરિકી સેનાના કમાન્ડર-ઇન-ચીફ છે.”
ઈરાનની સરકાર પડી ભાંગવાનો લીટરનો દાવો
અરાઘચીની આ ટિપ્પણી ગુરુવારે ન્યૂઝમૅક્સ (Newsmax)ને આપેલા ઇઝરાયલી રાજદૂત યેચિએલ લીટરના ઇન્ટરવ્યૂ બાદ સામે આવી છે. ઇન્ટરવ્યૂમાં લીટરે ઈરાનની હારને અમેરિકી સૈનિકોની તેમના પરિવાર પાસે વાપસી સાથે જોડી હતી. લીટરે કહ્યું હતું કે ઈરાનની હાર બાદ અમેરિકી સૈનિકોને તેમના પરિવાર પાસે પરત મોકલી શકાશે. તેમણે એવો પણ દાવો કર્યો હતો કે અંતે ઈરાનની સરકારનું પતન થશે. લીટરે અમેરિકા અને ઇઝરાયલને ધીરજ તથા દૃઢ નિશ્ચય જાળવી રાખવાની અપીલ કરી હતી. હાલમાં વોશિંગ્ટન અને તેલ અવીવ ઈરાન તથા તેના પ્રાદેશિક સહયોગીઓનો સામનો કરી રહ્યા છે. જોકે, તેમણે સ્પષ્ટ કર્યું હતું કે ઈરાન અંગેની નીતિનો અંતિમ નિર્ણય અમેરિકી રાષ્ટ્રપતિ ડોનાલ્ડ ટ્રમ્પ જ લે છે.
ટ્રમ્પ અને નેતન્યાહૂ વચ્ચે ઈરાન મુદ્દે મતભેદ?
આ સમગ્ર ઘટનાક્રમ એવા સમયે સામે આવ્યો છે, જ્યારે ઈરાન સામે આગામી પગલાં અંગે અમેરિકી રાષ્ટ્રપતિ ડોનાલ્ડ ટ્રમ્પ અને ઇઝરાયલના વડાપ્રધાન બેન્જામિન નેતન્યાહૂના વલણમાં તફાવત જોવા મળી રહ્યો છે. ટ્રમ્પે સંકેત આપ્યો છે કે તેઓ ઈરાન સામે આગળની કાર્યવાહી અંગે નિર્ણય લેવા માટે નવા વર્ષની શરૂઆત સુધી રાહ જોશે. બીજી તરફ, નેતન્યાહૂ વોશિંગ્ટન પર તેહરાન વિરુદ્ધ ફરીથી બોમ્બમારો શરૂ કરવા માટે દબાણ કરી રહ્યા છે. 'એક્સિઓસ' (Axios)ને આપેલા એક વિશેષ ઇન્ટરવ્યૂમાં ટ્રમ્પે કહ્યું હતું કે તેઓ ઈરાન સામે ફરી સૈન્ય કાર્યવાહી શરૂ કરવા અંગે ઉતાવળમાં નથી. તેમના મતે, આગામી અઠવાડિયાઓમાં અમેરિકા પોતાના તમામ વિકલ્પો પર વિચાર કરી શકે છે.
‘કોઈ નિર્ણય લેવામાં ઉતાવળ નથી’: ટ્રમ્પ
ચીનમાં એશિયા-પેસિફિક ઇકોનોમિક કોઓપરેશન (APEC) સમિટ બાદ અમેરિકા પરત ફરતી વખતે એરફોર્સ વન વિમાનમાં ટ્રમ્પે Axios સાથે વાતચીત કરી હતી. આ દરમિયાન તેમણે કહ્યું હતું કે, “હું ઈરાન અંગે કોઈ પણ નિર્ણય લેવામાં ઉતાવળ કરી રહ્યો નથી. આપણે જોઈશું કે વર્ષની શરૂઆત બાદ શું થાય છે.” ટ્રમ્પનું આ નિવેદન એવા સમયે આવ્યું છે, જ્યારે નેતન્યાહૂ ઈરાનને નિશાન બનાવીને વધુ એક નિર્ણાયક સૈન્ય હુમલો કરવાની માંગ કરી રહ્યા છે. આમ, ઈરાન સામે આગળની રણનીતિને લઈને અમેરિકા અને ઇઝરાયલના વલણ વચ્ચેનો તફાવત ચર્ચાનો વિષય બન્યો છે.











