યુક્રેન સાથે યુદ્ધવિરામ માટે સંમત થયા રશિયાના રાષ્ટ્રપતિ પુતિન, પરંતુ શરત આટલી...

રશિયાના રાષ્ટ્રપતિ વ્લાદિમીર પુતિન યુક્રેન સાથે યુદ્ધવિરામ માટે સંમત થયા છે, પરંતુ તેમણે તેના માટે એક શરત રાખી છે. એક અહેવાલ મુજબ, પુતિને કહ્યું કે, જો યુક્રેન તેના કબજા હેઠળના પ્રદેશોમાંથી સૈનિકોને હટાવે અને નાટોમાં જોડાવાની યોજના છોડી દે તો યુદ્ધ અટકી શકે છે. પુતિને કહ્યું કે, તેમણે એવી શરત રાખી છે જેથી આ યુદ્ધનો અંતિમ ઉકેલ શોધી શકાય. મોસ્કોમાં રશિયન વિદેશ મંત્રાલયમાં પોતાના ભાષણમાં તેમણે કહ્યું કે, રશિયા વિલંબ કર્યા વિના વાતચીત માટે તૈયાર છે.

પુતિને શું માગણી કરી છે?

રશિયન રાષ્ટ્રપતિએ બંને દેશો વચ્ચે શાંતિ પુનઃસ્થાપિત કરવા માટે અન્ય ઘણી માગણીઓ કરી છે, જેમાં યુક્રેનનો બિન-પરમાણુ દરજ્જો, તેમના સૈન્ય દળો પર પ્રતિબંધ અને રશિયન ભાષી લોકોના હિતોની સુરક્ષાનો સમાવેશ થાય છે. પુતિને કહ્યું, "આ તમામ મૂળભૂત આંતરરાષ્ટ્રીય કરારોનો ભાગ બનવું જોઈએ અને રશિયા સામેના તમામ પશ્ચિમી દેશોના પ્રતિબંધો હટાવવા જોઈએ, તો જ યુદ્ધવિરામ હાંસલ કરી શકાય છે."

https://twitter.com/PTI_News/status/1801565072621203594

'ઈતિહાસના દુઃખદ પાનાને ફેરવવાનો સમય'

રશિયન રાષ્ટ્રપતિએ કહ્યું, "અમે ઈતિહાસનું દુઃખદ પાનું ફેરવવા અને રશિયા, યુક્રેન અને યુરોપ વચ્ચે એકતા પુનઃસ્થાપિત કરવા માટે આહ્વાન કરી રહ્યા છીએ." જોકે, રશિયા દ્વારા કોઈ નવી માગણી કરવામાં આવી નથી. યુદ્ધ રોકવા માટે રશિયા અગાઉ પણ આવી માગણી કરી ચૂક્યું છે. રશિયાના રાષ્ટ્રપતિ પુતિનની આ ટિપ્પણી ઈટાલીમાં આયોજિત G7 સમિટ વચ્ચે આવી છે. અગાઉ 8 જૂને પુતિને યુક્રેનમાં યુદ્ધ જીતવા માટે પરમાણુ હથિયારોના ઉપયોગની વાતને નકારી કાઢી હતી.