VIDEO: અમેરિકાને સાઈડમાં રાખી ભારતને ગણાવ્યું શક્તિશાળી, બેલારુસના રાષ્ટ્રપતિએ ટોપ 3 માં આપ્યું સ્થાન
છેલ્લું અપડેટ : 02 Sept 2026
કિર્ગિસ્તાનની રાજધાની બિશ્કેક (Bishkek)માં ચાલી રહેલી શાંઘાઈ કોઓપરેશન ઓર્ગેનાઈઝેશન (SCO) સમિટ દરમિયાન ભારતને લઈને એક મહત્વપૂર્ણ નિવેદન સામે આવ્યું છે. બેલારુસના રાષ્ટ્રપતિ એલેક્ઝાન્ડર લુકાશેન્કોએ (Alexander Lukashenko) દુનિયાના ત્રણ શક્તિશાળી દેશોની યાદીમાં ભારતનો સમાવેશ કર્યો છે. ખાસ વાત એ છે કે આ યાદીમાં અમેરિકાનું નામ નથી.
SCO સમિટમાં પોતાના સંબોધન દરમિયાન લુકાશેન્કોએ કહ્યું કે દુનિયામાં ત્રણ એવા શક્તિશાળી દેશો છે જે આર્થિક અને પરમાણુ શક્તિ (Nuclear Power)ની દૃષ્ટિએ ખૂબ મહત્વ ધરાવે છે. તેમણે ચીન, રશિયા અને ભારતને આ ત્રણ દેશો ગણાવ્યા હતા. આ નિવેદન એવા સમયે આવ્યું છે જ્યારે વૈશ્વિક રાજકારણમાં (Global Politics) ભારતનું મહત્વ સતત વધી રહ્યું છે.
SCO સમિટમાં વડાપ્રધાન નરેન્દ્ર મોદી (PM Narendra Modi) પણ હાજર રહ્યા છે. આ સંગઠનમાં ભારત, ચીન, રશિયા, પાકિસ્તાન, ઈરાન, બેલારુસ, ઉઝબેકિસ્તાન, કઝાકિસ્તાન, તાજિકિસ્તાન અને કિર્ગિસ્તાન સહિતના દેશો સામેલ છે.
SCO ઘોષણાપત્રમાં આતંકવાદ મુદ્દે મહત્વનો સંદેશ
SCOના બિશ્કેક ઘોષણાપત્ર (Bishkek Declaration)માં આતંકવાદ સામેની લડાઈમાં ‘ડબલ સ્ટાન્ડર્ડ’ને અસ્વીકાર્ય ગણાવવામાં આવ્યો છે. સભ્ય દેશોએ પશ્ચિમ એશિયા (West Asia)ની સ્થિતિ અંગે ચિંતા વ્યક્ત કરી હતી અને ઈરાન પર અમેરિકાના હુમલાની પણ નિંદા કરી હતી.
ઘોષણાપત્રમાં આતંકવાદ, અલગાવવાદ અને ઉગ્રવાદ સામે સાથે મળીને કાર્યવાહી કરવાની પ્રતિબદ્ધતા વ્યક્ત કરવામાં આવી છે. સાથે જ આતંકવાદી અથવા ઉગ્રવાદી હેતુઓ માટે ઈન્ટરનેટ (Internet)ના દુરુપયોગને રોકવા માટે સહયોગ વધારવા પર પણ ભાર મૂકાયો છે.
ભારતે પણ સુરક્ષા મુદ્દે રજૂ કર્યો પક્ષ
ભારતે SCO સમિટ દરમિયાન સુરક્ષા સહયોગ (Security Cooperation) મજબૂત કરવા અને આતંકવાદ તથા ઉગ્રવાદ જેવા વૈશ્વિક પડકારો સામે સંયુક્ત પ્રયાસો કરવાની જરૂરિયાત પર ભાર મૂક્યો હતો.
વડાપ્રધાન મોદીએ આતંકવાદને સરકારી નીતિ (State Policy) તરીકે ઉપયોગ કરતા દેશો સામે કડક વલણ અપનાવવાની અપીલ કરી હતી. આગામી SCO રાષ્ટ્રાધ્યક્ષોની બેઠક 2027માં પાકિસ્તાનમાં યોજાવાની છે.
આ સમગ્ર ઘટનાક્રમમાં બેલારુસના રાષ્ટ્રપતિ દ્વારા ભારતને ચીન અને રશિયા સાથે વિશ્વના ત્રણ શક્તિશાળી દેશોમાં સ્થાન આપવું ભારતની વધતી વૈશ્વિક અસર (Global Influence)ને દર્શાવતું મહત્વપૂર્ણ નિવેદન માનવામાં આવી રહ્યું છે.
